AQSh «arab NATO-syn» qurǵysy keledi
ÁBÝ-DABI. QazAqparat - Aq úıdiń joǵary laýazymdy ókili Vashıngtonda birqatar arab buqaralyq aqparat quraldarynyń tilshilerine AQSh prezıdenti Donald Tramptyń Taıaý Shyǵysta Soltústikatlantıkalyq sharttyń (NATO) analogy boıynsha qaýipsizdik uıymyn qurýǵa múddeli ekenin habarlady.
Amerıkalyq ókildiktiń jabyq brıfıngi Tramptyń el prezıdenti laýazymyndaǵy alǵashqy sheteldik sapary barysynda ótti. Eske salsaq, amerıkalyq prezıdent jumys saparymen Saýd Arabııasyna barady, onda ekijaqty kezdesýlerden basqa óńirdiń arab memleketteri sammıtine qatysýy josparlanǵan.
«Panarabtyq qaýipsizdik uıymdarynyń qurylymy Vashıngtonnyń kóptegen odaqtastaryn qamtıtyn birlesken qaýipsizdik kaolıtsııasy arqyly óńirde turaqtylyq pen qaýipsizdikti qamtamasyz etý úshin «Islam memleketin» joıǵannan keıin qurylady», - dedi Aq úıdiń joǵary laýazymdy ókili.
Ol uıym jumyspen qamtý jáne ınvestıtsııa úshin múmkindikter týdyryp, ony keńeıtetini týraly aıtty. Bunyń sońy ekonomıkalyq ósimge, qaıta jańartýǵa, bosqyndardy qaıtarýǵa, óńirdegi uzaqqa sozylǵan qaqtyǵysty toqtatýǵa alyp kelmek.
«Ál Arabııa» telearnasy osylaısha AQSh prezıdentiniń jospary aldymen Saýd Arabııasyna barý, sosyn Er-Rııadtyń basqarýshy otbasymen myqty qatynas ornatýdan turatynyn habarlady. Prezıdent Tramp bul joldaýdy Saýd Arabııasy koroliniń muragerlik hanzadasynyń orynbasary Mohammed ben Salman Vashıngtonǵa kelgen ýaqytta berip jibergen. Budan basqa, Tramptyń ákimshiligi musylmandarǵa qarsy soǵysqysy kelmeıtinin, tek ekstremızm men radıkalızmge qarsy tabandy áreket etkisi keletinin jetkizýge tyrysýda.
