AQSh Anthropic kompanııasynyń JI modelderin eksporttaýǵa qaıta ruqsat berdi
ASTANA. KAZINFORM — AQSh-tyń Saýda mınıstrligi Anthropic kompanııasynyń Claude Fable 5 jáne Mythos 5 jasandy ıntellekt modelderine qatysty eksporttyq shekteýlerdi alyp tastady. Bul týraly Kazinform agenttiginiń Vashıngtondaǵy menshikti tilshisi CNBC-ge silteme jasap habarlady.
Buǵan deıin kompanııa AQSh úkimetiniń talabyna sáıkes atalǵan modelderge qoljetimdilikti shekteýge májbúr bolǵan. Endi olar AQSh-taǵy jáne sheteldegi paıdalanýshylar men seriktester úshin kezeń-kezeńimen qaıta qoljetimdi bola bastady.
Anthropic kompanııasynyń málimetinshe, Fable 5 modeli qaıtadan Claude, Claude Code, Amazon Web Services, Google Cloud jáne Microsoft Foundry platformalarynda qoljetimdi bolady. 7 shildege deıin bul modelge Pro, Max, Team aqyly tarıfteriniń paıdalanýshylarynyń shamamen jartysy, sondaı-aq keıbir korporatıvtik josparlardyń klıentteri qol jetkize alady.
Kompanııa sondaı-aq AQSh úkimetimen yntymaqtastyqty jalǵastyryp, Glasswing kıberqaýipsizdik baǵdarlamasy aıasynda Mythos 5 modeline amerıkalyq jáne halyqaralyq seriktesterdiń kóbirek qol jetkizýine múmkindik bermek. Bul baǵdarlama tańdalǵan uıymdarǵa qorǵanys quraldaryn synaqtan ótkizý úshin ozyq jasandy ıntellekt modelderin paıdalanýǵa múmkindik beredi.
Ýaqytsha tyıym salada alańdaýshylyq týǵyzdy. Sebebi ol Qytaıdyń jasandy ıntellekt modelderi qarqyndy damyp, amerıkalyq ázirlemelerge eleýli básekeleske aınalyp jatqan kezeńge tuspa-tus keldi. Tehnologııalyq kompanııalardyń ókilderi mundaı shekteýler qytaılyq ázirleýshilerge qosymsha artyqshylyq beredi dep qaýiptengen edi.
Bul jaǵdaı AQSh-ta jasandy ıntellekt tehnologııalaryn damytýǵa memlekettik baqylaýdyń kúsheıip kele jatqanyn kórsetti. Donald Tramp ákimshiligi ázirleýshilerden jańa modelderdi keńinen engizbes buryn memleketke aldyn ala tekserýge usynýdy talap etedi.
Mundaı rásimdi qazirdiń ózinde OpenAI kompanııasy da ustanyp keledi. Degenmen kompanııa mundaı tájirıbe turaqty talapqa aınalmaýy tıis dep esepteıdi.
Buǵan deıin Anthropic 2027 jylǵa qaraı JI-dyń baqylaýdan shyǵý qaýpi týraly eskertkenin jazǵan bolatynbyz.
