AQSh Almatyda Bas konsýldyqtyń jańa ǵımaratyn salýǵa nıetti

ALMATY. QazAqparat – Bas konsýldyq ǵımaratyn jańadan salý máselesi Almaty ákimi Erbolat Dosaev pen AQSh memlekettik hatshysynyń orynbasary Ýzroı Zeıanyń kezdesýi barysynda aıtyldy, dep habarlaıdy QazAqparat tilshisi.

Kezdesý barysynda azamattyq qoǵamdastyqpen, úkimettik emes uıymdarmen odan ári yntymaqtastyq, ESG qaǵıdattaryn engizýdi jandandyrý, qalany ınklıýzıvti damytý máseleleri talqylandy.

Amerıkalyq tarap Almatydaǵy AQSh Bas konsýldyǵynyń jańa ǵımaratyn salýǵa nıetti ekenin jetkizdi.

Sondaı-aq, taraptar saýda-ekonomıkalyq baılanysta qoljetken ýaǵdalastyqtar týraly aıtty. Erbolat Dosaev Almaty ekonomıkasyn qalpyna keltirýdegi ákimdiktiń búgingi jumystary, qalanyń áleýmettik-ekonomıkalyq damý jospary týraly habardar etti.

Ákimdiktiń málimetine súıensek, alǵashqy úsh aıdyń qorytyndysy boıynsha qalanyń negizgi kapıtalyna (+19,8%), ónerkásipke (+11,5%), qurylysqa (+38,6%) tartylǵan ınvestıtsııa kólemi ósken. Shaǵyn jáne orta bıznes sýbektileriniń sany 8,5%-ǵa artyp, 213 myńnan asty.

Ekijaqty yntymaqtastyqtyń oń qarqyny da atalyp ótti. Ótken jyldyń qorytyndysy boıynsha Almaty men AQSh arasyndaǵy taýar aınalymy 662,1 mln. AQSh dollary kóleminde bolǵan. Qalada 128 birlesken kásiporyn jáne 399 amerıkalyq kompanııa qyzmet etedi.

Eske sala keteıik, Almaty ákimi Eýropa qaıta qurý jáne damý bankiniń vıtse-prezıdenti Alan Pııýmen qalanyń ınfraqurylymyn jaqsartý jónindegi jobalardy, sondaı-aq shaǵyn jáne orta bıznesti damytý jónindegi bastamalardy talqylaǵan bolatyn.