AQSh-ta alıment boıynsha qaryzy bar azamattardyń tólqujaty joıylady
ASTANA. KAZINFORM — AQSh Memlekettik departamenti búginnen bastap alıment boıynsha qomaqty qaryzy bar ata-analardyń tólqujatyn joıýdy bastaıdy, dep habarlaıdy Associated Press.
Bul shara alǵashqy kezeńde qaryzy 100 000 dollardan asatyn shamamen 2 700 amerıkalyq azamatqa qatysty qoldanylady. Keıin baǵdarlama edáýir keńeıtilip, 2 500 dollardan joǵary qaryzy bar barlyq azamatty qamtıdy — bul shek 1996 jyly belgilengenimen, is júzinde kóp qoldanylmaǵan. Bul naýqanda qansha adamnyń qamtylatyny ázirge belgisiz, óıtkeni AQSh Densaýlyq saqtaý jáne áleýmettik qyzmetter mınıstrligi shtattardan derekter jınaýdy jalǵastyryp jatyr. Degenmen ondaǵan myń adam iligýi múmkin.
Buǵan deıin tólqujatyn joıý tek ony uzartýǵa ótinish bergenderge ǵana qatysty bolatyn. Endi qujat ıesiniń ótinishine qaramastan, aldyn ala tártippen — proaktıvti túrde alynatyn bolady.
— Biz alıment óndirip alýda tıimdiligin dáleldegen tájirıbeni keńeıtip jatyrmyz. Qaryz ótelgen sátte ata-analar qaıtadan tólqujatyn paıdalana alady, — dedi konsýldyq máseleler jónindegi memlekettik hatshynyń kómekshisi Mora Namdar.
Vedomstvo dereginshe, baǵdarlama 1998 jyly iske qosylǵannan beri shtattar shamamen 657 mln dollar óndirip alǵan, onyń ishinde sońǵy bes jylda 156 mln dollardan astamy birjolǵy tólemder arqyly túsken.
Tólqujattary jaramsyz dep tanylǵan azamattarǵa qujattyń shetelge shyǵýǵa jaramsyz ekeni týraly habarlama jiberiledi. Eger adam shetelde júrgen kezde qujaty buǵattalsa, ol AQSh elshiligine nemese konsýldyǵyna júginip, elge qaıtý úshin jedel jol júrý qujatyn ala alady.
Alıment máselesi boıynsha Qazaqstanda da jaǵdaı máz emes. Elimizde 12 myń adamnyń alıment qaryzy bar. Somasy 18 mlrd teńgege jetip otyr.
