AQSh «Ál-Kaıdanyń» Iemendegi lagerine áýeden soqqy jasady
ASTANA. QazAqparat - Amerıkanyń ÁÁK-i «Ál-Kaıda» ekstremıstik tobynyń Arab túbeginde ornalasqan jattyǵý lagerine (AKAP) áýeden soqqy jasap, ondaǵan sodyrdyń kózin joıdy, dep habarlady Pentagon.
«Bul áýe shabýyly AKAP-tyń Iemendi amerıkalyq azamattarǵa qaýip tóndiretin shabýyl bazasy retinde paıdalaný múmkindikterine kúrdeli zııan keltirdi. Bul sondaı-aq bizdiń «Ál-Kaıdany» joıyp, ol úshin qaýipsiz oryndardy boldyrmaýǵa degen yntamyzdy kórsetip otyr», - dep málim etti Amerıka Qorǵanys mınıstrliginiń ókili Pıter Kýk.
«Ál-Kaıdanyń» Iemen ońtústiginde oryn tepkenine biraz ýaqyt boldy. Onyń quramyna kiretin súnnıt sodyrlar hýsıttermen (kóterilisshi sheıitter) qyrǵyn soǵys júrgizip jatyr.
Buǵan deıin «Ál-Kaıda» sodyrlarynyń Iemenniń ońtústigindegi Ahvar qalasyn basyp alǵany belgili boldy.
Iemendegi qarýly qaqtyǵys 2014 jyldan beri jalǵasyp keledi. Kóterilisshi hýsıtter men burynǵy prezıdent Álı Abdalla Salehke adal bolyp qalǵan el áskeriniń bir bóligi ózderi qýǵan prezıdent Abd Rabb Mansur Hadıdiń jasaqtaryna qarsy soǵys júrgizip jatyr.
