AQSh aktsııalary Tramp jeńisi jarııalanǵannan keıin kóterildi

ASTANA. KAZINFORM — Sársenbi kúni AQSh-tyń qor naryǵy kúrt kóterilip, prezıdenttik saılaýdan keıingi alǵashqy saýda kúninde aıtarlyqtaı ósim kórsetti, dep habarlaıdy ABC News. 

Dow Jones Industrial Average ındeksi 3,6%-ǵa ósti. Bul kórsetkish Dow úshin 2022 jyldan beri eń jaqsy saýda kúni boldy. S& P 500 ındeksi 2,5%-ǵa, al Nasdaq ındesi 3%-ǵa jýyq ósti.

Donald Tramptyń Trump Media & Technology medıa kompanııasynyń aktsııalary 6 paıyzǵa ósip, bir aktsııa úshin 36 dollardy qurady.

Tramptyń odaqtasy Ilon Mask basqaratyn Tesla kompanııasynyń aktsııalary sársenbide shamamen 14,5% qymbattady.

Donald Tramp sársenbi kúni tańerteń Florıdada sahnaǵa shyqqanda, AQSh valıýtasy nyǵaıa tústi. AQSh dollarynyń ındeksi shamamen 1,4%-ǵa ósip, tamyz aıynyń basynan beri bolmaǵan deńgeıge jetti. 10 jáne 2 jyldyq qazynashylyq oblıgatsııalar kiristiligi de bir túnde ósti.

Sársenbide Azııadaǵy saýda aralas boldy, óıtkeni halyqaralyq naryqtar saılaý nátıjelerin qorytty. Japondyq Nikkei bir kúnde 2,61%-ǵa qymbattady, al shanhaılyǵy is júzinde ózgerissiz nebári 0,09%-ǵa tómendep jabyldy. Gonkongtyń Hang Seng ındeksi jabylý sátinde 2,23%-ǵa tómendedi.

Ulybrıtanııanyń FTSE 100 ındeksi sársenbi kúni tańerteń kóterilip, ashylýdan keıin 1,43% shamasynda kóterildi. Nemistiń DAX-y tańǵy saýdada shamamen 1,3%-ǵa kóterilip, uqsas ósim kórsetti.

Buǵan deıin habarlanǵandaı, AQSh-tyń burynǵy prezıdenti Donald Tramp saılaýda jeńiske jetip, Aq úıge oraldy. Oǵan berilgen daýystar sany basty qarsylasy Kamala Harrısten basym tústi. 

Eýroparlament fraktsııasynyń teń tóraǵalary Trampty jeńisimen quttyqtady. 

Memleket basshysy Qasym-Jomart Toqaev Amerıka Qurama Shtattary Prezıdentiniń saılaýynda aıqyn jeńiske jetken Donald Trampqa quttyqtaý jedelhatyn joldady.