AQSh aqshalaı kepilmen vıza berýdi kózdeıtin pılottyq baǵdarlamany iske qosty

ASTANA. KAZINFORM – AQSh 15 myń dollarǵa deıingi aqshalaı kepilmen vıza berý boıynsha pılottyq baǵdarlamany iske qospaq, dep habarlaıdy TASS. 

Kepil engizgen adamnyń AQSh aýmaǵynan belgilengen merzimde shyqqannan keıin bul soma tolyq qaıtarylady dep kózdelip otyr.

Amerıka Qurama Shtattary shetel azamattaryna 15 myń dollarǵa deıingi aqshalaı kepilmen kiris vızalaryn berý boıynsha pılottyq baǵdarlamany iske qosyp otyr. Bul týraly AQSh úkimetiniń resmı qujattary jarııalanatyn Federaldyq tizilim derekter bazasynda elektrondy túrde ornalastyrylǵan Memlekettik departamenttiń habarlamasynda aıtylǵan.

Habarlamada naqtylanǵandaı, baǵdarlama tek iskerlik jáne týrıstik vızalarǵa (B-1 jáne B-2 sanattary) qatysty jáne AQSh-qa kirgennen keıin belgilengen merzimnen artyq zańsyz qalyp qoıatyn azamattardyń úlesi aıtarlyqtaı joǵary elderdiń azamattaryna qoldanylady. Sonymen qatar, aqshalaı kepil nusqasy, vızany alýǵa ótinish bergen tulǵa týraly konsýldyqtarǵa usynylǵan aqparat AQSh tarapyna jetkiliksiz bolyp kóringen jaǵdaıda qoldanylatyn bolady.

Baǵdarlamaǵa sáıkes, engizilgen kepildik soma ótinish bildirýshi adamnyń AQSh-tan belgilengen merzimde shyqqannan keıin tolyq kólemde qaıtarylady. Kepil kólemi naqty jaǵdaılarǵa baılanysty 5 000, 10 000 jáne 15 000 dollar mólsherinde belgilenedi.

Baǵdarlama týraly habarlandyrý jarııalanǵan kúnnen bastap bir jyl ishinde júzege asyrylatyn bolady. Resmı jarııalanýy 5 tamyzǵa josparlanǵan.

Aıta ketelik AQSh Reseıge qarsy sanktsııa engizýge daıyn.