AQSh ákimshiligindegi kelispeýshilikter iske Trampty aralasýǵa májbúr etti

ASTANA. KAZINFORM – Prezıdent Donald Tramp Ilon Mask pen Mınıstrler kabıneti arasyndaǵy kelisimge qol jetkizýge tyrysyp jatyr. Bul jerde Úkimet tıimdiligin arttyrý departamenti basshysynyń olardyń vedomstvolaryna aralasýyna baılanysty alaýyzdyq kúsheıip keledi, dep habarlaıdy POLITICO.

Vashıngtonda Mask bıligine narazylyq birneshe apta boıy kúsheıip, shıelenis Memlekettik hatshy Marko Rýbıo, kólik mınıstri Shon Daffı, qorǵanys mınıstri Pıt Hegset jáne ardagerler isteri jónindegi hatshy Dag Kollınz beısenbide Ilon Masktyń federaldyq agenttikter men shtat baǵdarlamasynyń qysqarýyna baılanysty alańdaýshylyǵyn bildirgen kezde artty.

Rýbıo onyń komandasy Memlekettik departamenttiń baqylaýyndaǵy AQSh halyqaralyq damý agenttigin taratqannan keıin Maskqa birneshe apta boıy ashýlanyp júrdi, dep jazdy News18.

Tramp óz ákimshiliginiń joǵary laýazymdy múshelerine Masktyń departamentterge usynystar berýge quqyǵy bar ekenin, biraq kadr nemese saıasat boıynsha birjaqty sheshim qabyldamaıtynyn aıtty. Prezıdent málimdemesi – Mask ókilettigin taryltýdaǵy alǵashqy mańyzdy qadam.

Úkimet tıimdiligi departamentiniń basshysy Tramptyń nusqaýymen kelisetinin rastady.

Aq úı basshysy juma kúni Sopaq keńsede tilshiler aldynda sóılegen sózinde Rýbıo men Mask «jaqsy til tabysqanyn» jáne olardyń arasynda «eshqandaı qaıshylyq joq» ekenin málimdedi.

Aq úıdiń baspasóz hatshysy Kerolaın Lıvıtt óz málimdemesinde «barlyǵy prezıdent Trampqa úkimetimizdi tıimdirek etý týraly ýádesin oryndaýǵa kómektesý úshin komanda bolyp jumys istep júrgenin» aıtty.

Buǵan deıin Ilon Mask Donald Tramp saıasatynyń kesirinen baılyǵynyń tórtten birin joǵaltqanyn jazǵan bolatynbyz.