AQSh Ádilet mınıstrligi quny 15 mlrd dollardy quraıtyn bıtkoındi tárkiledi

ASTANA. KAZINFORM – Ádilet mınıstrligi AQSh tarıhynda bıtkoınderdiń eń iri tárkileýin júrgizdi, onyń jalpy somasy 15 mlrd dollardy quraǵan, dep habarlaıdy FOX Business. 

Brýklındegi (Nıý-Iork shtaty) federaldy prokýratýra Prince Holding Group iri jelisiniń jetekshisi, «Vınsent» degen atpen belgili Chen Chjıge Kambodjadaǵy krıptovalıýtalyq alaıaqtyqqa qatysy bar degen kúdikpen aıyptaý qorytyndysyn shyǵardy. 

Osy ýaqytqa deıin bostandyqta júrgen 37 jastaǵy Chjı májbúrli eńbek alaıaqtyǵyn uıymdastyrdy jáne búkil el boıynsha Prince Holding Group jumysshylaryna zorlyq kórsetti dep aıyptalyp otyr. 

Uryp-soǵý sýretteri Nıý-Iorktiń Shyǵys okrýgi boıynsha AQSh okrýgtik sotynda jarııalanǵan dáleldemelerge qosyldy. 

Nıý-Iorktiń Shyǵys okrýgindegi AQSh advokaty Djozef Nochellanyń habarlaýynsha, kompanııa aýqymdy kólemdegi ınvestıtsııalyq alaıaqtyq shemasynyń tasasynda bolǵan. 

Sot qujattaryna sáıkes, Chjı 30-dan astam elde jyljymaıtyn múlik, qarjy jáne turmystyq qyzmet kórsetý salalaryna ınvestıtsııa salǵan Prince Holding Group-ty «telefon fermalarynyń» aýqymdy jelisine aınaldyrdy. 

Onda adam saýdasynyń qurbandary bolǵan jumysshylar ınternette jalǵan romantıkalyq qarym-qatynas, qarjylyq kómek suraý nemese tabysty krıptovalıýtaǵa tıimdi ınvestıtsııa salý ýádelerimen áleýetti qurbandardy azǵyrý arqyly alaıaqtyq shemalarǵa qatysýǵa májbúr boldy. Ádilet mınıstrliginiń málimetinshe, mundaı shemalar «sha zhu pan» (杀猪盘) nemese «pig butchering» («shoshqa soıý») dep atalady. 

Bılik málimetinshe, Chjı kompanııasy krıptovalıýta qarajatyn urlaý arqyly kúnine 30 mln dollarǵa deıin tabys tapty, aqsha paıdalanýshy beıresmı kiltter men qarajatty tolyq baqylaı alatyn hostıngtik emes tsıfrlyq ámııandar arqyly shyǵarylǵan.

Quny 15 mlrd dollar 127 271 bıtkoın AQSh-ta saqtalyp otyr, olar buryn Chjı basqaratyn ámııandarda saqtalǵan. 

- Bul adam mıllıondaǵan jazyqsyz adam qurbany bolǵan májbúrli eńbek, aqshany jylystatý, ınvestıtsııalyq shemalar jáne aktıvterdi urlaýmen aınalysyp, birneshe qurlyqta aýqymdy qylmystyq jelini basqardy dep shamalanyp otyr. Búgin FTR men onyń seriktesteri tarıhta qarjylyq alaıaqtyq áreketterine qarsy eń iri operatsııalardyń birin júrgizdi, - dedi FTR dırektory Kash Patel. 

AQSh Qarjy mınıstrligi Prince Holding Group tobyn «transulttyq qylmystyq uıym» dep tanyp, Chen Chjı men onyń seriktesterine qarsy sanktsııalar týraly jarııalady.

Buǵan deıin Tramptyń Qytaımen saýda qaqtyǵysy týraly málimdemesi krıptovalıýta naryǵyn qulatqanyn jazǵan bolatynbyz.