AQSh Ádilet mınıstrligi Epshteın men Maksvell isi boıynsha 3,5 mln bettik qujatty jarııalady
ASTANA. KAZINFORM – AQSh Ádilet mınıstrligi Djeffrı Epshteın men Gısleın Maksvell isi boıynsha qujattardyń 3 mln astam qosymsha betin jarııalady. Bul týraly AQSh Bas prokýrorynyń orynbasary Todd Blansh málimdedi.
Bul jazba prezıdent Donald Tramp 2025 jyldyń 19 qarashasynda qol qoıǵan Djeffrı Epshteın faıldarynyń ashyqtyǵy týraly zańǵa sáıkes jarııalandy.
- Búgin biz qujattardyń 3 mıllıonnan astam betin, sonyń ishinde 2 myńnan astam beınejazba men 180 myń sýretti jarııalap jatyrmyz. Jalpy alǵanda bul mınıstrliktiń zańǵa sáıkes shamamen 3,5 mln bet usynǵanyn bildirip otyr, - dep málimdedi Blansh.
Ol beıneler men sýretterge tek Epshteın nemese onyń aınalasyndaǵylar túsirgen materıaldar ǵana emes, sonymen qatar Epshteınniń qurylǵylarynan tárkilengen kommertsııalyq pornografııanyń aıtarlyqtaı mólsheri de kiretinin naqtylady. Bul rette keıbir materıaldardy shynymen de Epshteınniń ózi nemese oǵan jaqyn adamdar jasaǵan.
Onyń aıtýynsha, Nıý-Iorktiń úsh okrýgi men Florıdadaǵy Ádilet mınıstrligi, FTB jáne AQSh prokýratýrasynyń ártúrli bólimshelerinen 500-den astam zańger men maman qujattardy jarııalaý úshin 75 kún jumys istedi. Qyzmetkerler demalys kúnderi, Rojdestvo jáne Jańa jyl merekelerinde jumys istegen.
Bastapqyda iske qatysy bar bolýy múmkin elektrondyq hat jazysý, jaýap alý hattamalary, sýretter jáne beınelerdi qosa alǵanda 6 mln-nan astam betten turatyn yqtımal materıaldar jınaldy. Kóp deńgeıli tekseristen keıin jarııalaý úshin 3 mln-nan astam bet jiberildi.
Ol jábirlenýshilerdiń jeke aqparaty men medıtsınalyq jazbalary bar qujattar, balalarǵa jynystyq zorlyq-zombylyq kórsetýdiń sýretteri, júrgizilip jatqan tergeýlerge zııan keltirýi múmkin materıaldar, ólim, fızıkalyq zorlyq-zombylyq kórsetý nemese dene jaraqatyn salý sýretteri jáne zańdy qupııalylyqpen qorǵalatyn aqparattyń jarııalanbaǵanyn naqtylady. Blansh zań buǵan ruqsat berse de ulttyq qaýipsizdik nemese syrtqy saıasat sebebi boıynsha birde-bir qujattyń jasyrynbaǵanyn atap ótti.
Jábirlenýshilerdi qorǵaý úshin Gısleın Maksvelden basqa barlyq áıeldiń fotosýretteri men beıneleri óńdeldi. Er adamdardyń sýretteri áıelderdi jasyrý úshin qajet bolǵan jaǵdaıdan basqa jerde óńdelgen joq.
Áleýetti redaktsııalyq qatelikterdi tez arada túzetý úshin Ádilet mınıstrligi jábirlenýshilerge tikeleı pikirler men suraqtar qoıýǵa arnalǵan arnaıy elektrondyq poshta mekenjaıyn qurdy.
Eske sala ketsek, pedofılııa úshin sottalyp, túrmede qaıtys bolǵan yqpaldy bıznesmen Epshteınniń isi prezıdent Donald Tramptyń ekinshi merzimindegi iri saıası janjaldardyń birine aınaldy.
Epshteın kóptegen yqpaldy adamdar jáne saıasatkerlermen, sonyń ishinde Tramptyń ózimen, sondaı-aq AQSh-tyń burynǵy prezıdenti Bıll Klıntonmen jáne basqa da kóptegen adamdarmen dostyq qarym-qatynasta boldy.
Buǵan deıin AQSh Ádilet mınıstrliginiń saıtynan keminde 13 foto joıylyp ketkeni habarlandy.