AQSh Ádilet mınıstrligi Djeffrı Epshteın isine qatysty qujattardy jarııalaı bastady

ASTANA. KAZINFORM – AQSh Ádilet mınıstrligi pedofılııa úshin  aıyptalyp, túrmede qaıtys bolǵan qarjyger Djeffrı Epshteınniń isinen myńdaǵan bettik qujattardy jarııalady. Ol kóptegen tanymal jáne yqpaldy adamdarmen qarym-qatynasta bolǵan, dep habarlaıdy BBS. 

Mınıstrlik bir aı buryn qabyldanǵan zań boıynsha materıaldardy jarııalaýǵa mindetti boldy.

Qujattardyń alǵashqy partııasy Ádilet mınıstrliginiń saıtynda jarııalanǵan soń saıtqa kelýshilerdiń aǵyny kóp bolǵany sonshalyq, olardy onlaın kezekke qoıýǵa týra keldi.

AQSh Bas prokýrorynyń orynbasary Todd Blansh Fox News arnasynyń efırinde Ádilet mınıstrligi birden birneshe júz myń paraqty, sodan keıin birneshe apta ishinde taǵy birneshe júz myń paraqty jarııalaýdy josparlap otyrǵanyn aıtty.

Reuters agenttiginiń habarlaýynsha, jarııalanǵan alǵashqy partııa 300 myńnan astam paraqty qamtıdy.

Epshteın isi materıaldarynyń ashyqtyǵy týraly zańdy (Epstein Files Transparency Act) AQSh Kongresi 19 qarashada biraýyzdan qabyldady, Parlament Ádilet mınıstrligine bul materıaldardy jarııalaýǵa 30 kún ýaqyt berdi.

Prezıdent Donald Tramp zańǵa sol kúni qol qoıdy. Tramp ákimshiligi buǵan deıin Epshteın isiniń materıaldaryn jarııalaý talaptaryna qarsy bolǵan, biraq Respýblıkalyq partııa saıasatkerleriniń kópshiligi ony qoldady, al prezıdent aqyrynda jasyratyn eshteńesi joq ekenin málimdep, oǵan jol berdi.

Tramp 1990 jáne 2000 jyldardyń basynda Epshteınmen dos bolǵanyn joqqa shyǵarmaıdy, biraq Epshteınge qylmystyq aıyp taǵylǵanǵa deıin kóp ýaqyt buryn onymen qarym-qatynasyn úzgenin aıtty.

Demokratııalyq partııa saıasatkerleri Tramp ákimshiligi materıaldardyń tek bir bóligin sońǵy kúni jarııalaý arqyly zańdy buzyp jatyr dep málimdedi.

- Tramp ákimshiliginiń Epshteın isiniń keıbirin ǵana emes, barlyq qujatyn jarııalaýǵa 30 kúni bolǵan. Olar muny istemeý arqyly zańdy buzyp otyr, - dedi Senattaǵy demokratııalyq azshylyq jetekshisi Chak Shýmer.

Shýmerdiń aıtýynsha, Demokratııalyq partııadan senatorlar Epshteın qylmystary qurbandarynyń advokattarymen jáne táýelsiz keńesshilermen birge qandaı qujattardyń jarııalanǵanyn jáne Shýmerdiń sózimen aıtqanda, Ádilet mınıstrliginiń qaısysyn jasyrýdy sheshkenin tekseredi.

Fotosýretterde Klınton, Maıkl Djekson, Endrıý jáne Mık Djagger bar

Ádilet mınıstrligi jarııalaǵan materıaldarda myńdaǵan fotosýret bar, onyń ishinde demokratııalyq kongresmender buryn jarııalaǵan fotosýretterde paıda bolǵan tanymal tulǵalardyń fotosýretteri de tur.

Álemdik baspasózdiń habarlaýynsha, fotosýretterde tanymal tulǵalardyń kez kelgen zańsyz áreketke qatysy bar ekenine tikeleı dálelder joq.

Bul fotosýretterde, mysaly, AQSh-tyń burynǵy prezıdenti Bıll Klınton bar. Fotolardyń birinde ol úlken vannada jatyr. Ekinshisinde Klınton Mık Djaggermen, al úshinshisi Maıkl Djeksonmen birge tur.

Fotosýretterdiń birinde Epshteınmen janjaldy dostyǵy úshin hanzadalyq ataǵynan aıyrylǵan Ulybrıtanııa koroliniń aǵasy Endrıý Maýntbatten-Vındzor bar.

Demokrat kongressmen Robert Garsııa baspasózge ózi jáne áriptesteri 20 myń qujat pen 95 myń fotosýret alǵanyn habarlady. Garsııanyń aıtýynsha, olar búkil jınaqty qarap shyǵyp, ony birtindep jarııalaýdy, Epshteın qurbandary týraly fotosýretter men jeke aqparatty súzýdi kózdep otyr.

Zańgerler Djeffrı Epshteınniń kóptegen tanymal adamdarmen qarym-qatynasta bolǵanyn jáne bul adamdardyń onyń muraǵatyndaǵy fotosýretterde bolýynyń ózi olardyń tarapynan eshqandaı zańsyz árekettiń dáleli bolyp tabylmaıtynyn atap ótti. Bul adamdardyń ózderi – olardyń kópshiligi kez kelgen zańsyz áreketke qatysy baryn joqqa shyǵaryp otyr.

Buǵan deıin Ókilder palatasy baqylaý komıtetiniń demokrattary Djeffrı Epshteınniń úıinen alynǵan 68 sýretti jarııalaǵanyn jazdyq.