AQSh 750 dollarǵa vızany jyldam óńdeýdi usynady
ASTANA. KAZINFORM — AQSh-tyń Memlekettik departamenti iskerlik jáne týrıstik vızalardy jedel rásimdeýge arnalǵan aqyly qyzmetti iske qospaq. Endi sheteldik azamattar standartty 185 dollarlyq alymnan bólek 750 dollar tólep, tólem jasaǵannan keıin on kún ishinde elshilik nemese konsýldyqtaǵy suhbatqa jazyla alady, dep habarlaıdy Associated Press.
Pılottyq baǵdarlama 1 shildede iske qosylyp, 2026 jyldyń 31 jeltoqsanyna deıin jalǵasady. Qajet bolǵan jaǵdaıda jáne suranysqa qaraı onyń merzimi uzartylýy múmkin. Baǵdarlamaǵa qatysatyn AQSh-tyń sheteldegi elshilikteri men konsýldyqtarynyń tizimi bastalar aldynda jarııalanady. Tıisti habarlama osy aptada resmı Federal Register basylymynda jaryq kóredi.
Jańa qyzmet Donald Trump ákimshiligi engizgen qatań vızalyq saıasattyń saldaryn ishinara jeńildetýge baǵyttalǵan. Sońǵy ýaqytta AQSh bıligi keıbir elderdiń azamattaryna vıza rásimdeý kezinde kepildik jarna engizdi. Negizinen Afrıka elderinde bul soma 15 myń dollarǵa deıin jetedi. Sonymen qatar ótinish berýshilerden áleýmettik jelidegi akkaýnttary týraly málimetterdi qosa alǵanda, jeke aqparattyń keń kólemin usyný talap etiledi.
Bul sharalar qujattardy qaraý merziminiń uzarýyna jáne álem boıynsha kóptegen shaǵymdardyń týyndaýyna sebep boldy.
Vızasyz kirý baǵdarlamasyna kirmeıtin elderdiń azamattary úshin suhbatqa jazylý kezegi qazirdiń ózinde birneshe aıǵa sozylýy múmkin. Alaıda qosymsha aqy tólenetin premıým qyzmet vızanyń berilýine kepildik bermeıdi — ol tek suhbatqa jazylý merzimin jedeldetedi.
Eske salaıyq, buǵan deıin Qazaqstan men Eýropalyq odaq vızalyq rejımdi jeńildetýdi talqylady.
