AQSh 75 eldiń azamattaryna vıza berýdi toqtatpaq

ASTANA. KAZINFORM – AQSh Memdepartamenti bul sheshimdi ótinim berýshilerdi baqylaýdy qataıtý sharalarynyń aıasynda qabyldap otyr, dep habarlaıdy DW.

Fox News telearnasynyń málimetinshe, jańa shekteýler 21 qańtardan bastap engiziledi jáne qosymsha habarlanǵanǵa deıin kúshinde bolady. Shekteý tizimine Reseımen qatar Aýǵanstan, Brazılııa, Mysyr, Iran, Irak, Iemen, Nıgerııa, Somalı, Taıland jáne basqa da elder engen.

Telearna deregine súıensek, Memlekettik departamenttiń qyzmettik jazbasynda bul sheshim «qoǵamǵa salmaq salýy múmkin» dep sanalatyn ótinish ıeleriniń jolyn kesý úshin qabyldanǵan. ıAǵnı Vashıngton endi vıza berýde qaýipsizdikpen qatar áleýmettik táýekel faktoryn da nazarǵa almaq.

Eske sala keteıik, buǵan deıin AQSh Memlekettik departamenti qylmystyq áreketterge baılanysty 100 myńnan astam vızany joıǵan bolatyn. Sondaı-aq Donald Tramp ákimshiliginiń sheteldik stýdentterge qatysty saıasatyn qataıtý aıasynda alty myńnan asa stýdenttik vıza keri qaıtarylǵany habarlandy.

Resmı derekterge sáıkes, bul jaǵdaılardyń basym bóligi shabýyl jasaý, mas kúıinde kólik júrgizý, urlyq-qarlyq jáne terrorızmdi qoldaý sııaqty quqyqbuzýshylyqtarmen baılanysty.

Qysqasy, AQSh vıza saıasatyn qaıta qaraý arqyly elge kim kirip, kimniń kirmeıtinin burynǵydan da qatań baqylap otyrmaq.

Osyǵan deıin AQSh-tyń Ortalyq Azııa azamattaryna 15 myń AQSh dollarǵa deıin vızalyq kepildik jarna engizgeni týraly jazdyq.