AQSh 6000-nan astam halyqaralyq stýdenttik vızanyń kúshin joıdy
ASTANA. KAZINFORM — AQSh Memlekettik departamenti 6 myńnan astam halyqaralyq stýdenttik vızanyń kúshin joıdy. Bul elde zań buzý men merzimi bitken soń da qalý jaǵdaılarynyń kóbeıýimen túsindirildi, dep habarlady VVS.
Vedomstvonyń málimetinshe, vızalardyń basym bóligi zorlyq-zombylyq, mas kúıinde kólik júrgizý, urlyq jáne lańkestikke kómektesý sııaqty zań buzǵany úshin joıyldy.
Bul sheshim AQSh prezıdenti Donald Tramptyń ákimshiligi ımmıgratsııa men halyqaralyq stýdentterge baqylaýdy kúsheıtip jatqan kezde qabyldandy. Sheneýnikter terrorızmge kómektesý degendi túsindirmedi, biraq úkimet Palestınany qoldap demonstratsııaǵa shyqqan keıbir stýdentterdi de nysanaǵa alyp, olardyń áreketterin antısemıtızm dep sıpattady.
Joıylǵan 6000-nan astam vızanyń 4000-ǵa jýyǵy zań buzýǵa baılanysty. INA-nyń 3V bólimi (adam ómirine qaýip tóndiretin nemese AQSh zańdaryn buzatyn lańkestik áreketterge qatysý) boıynsha taǵy 200-300 vızanyń kúshi joıyldy.
Tramp ákimshiligi buǵan deıin dúnıe júzindegi AQSh elshilikterindegi halyqaralyq stýdentterge vıza taǵaıyndaýdy ýaqytsha toqtatqan bolatyn. Maýsym aıynda protsess qaıta bastalǵan kezde, úmitkerlerden áleýmettik jelilerdegi akkaýnttaryn jarııa etý talap etildi. Sheneýnikter bul protsess AQSh azamattaryna, mádenıetine, úkimetine nemese prıntsıpterine qarsy kez kelgen dushpandyq belgilerin anyqtaý úshin jasalǵanyn aıtty. Sondaı-aq Memlekettik departament qyzmetkerlerine sheteldik lańkestik toptarǵa qoldaý kórsetetin nemese AQSh-tyń ulttyq qaýipsizdigine qaýip tóndiretin adamdardy anyqtaý tapsyryldy.
Memlekettik hatshy Marko Rýbıo mamyrda myńdaǵan stýdenttik vızalardyń kúshin joıǵanyn aıtty. Ol protsestiń jalǵasatynyn málimdedi. Demokrattar Tramp ákimshiliginiń sharalaryn stýdentterdiń quqyqtaryn buzý dep synady.
Open Doors málimetteri boıynsha 2023/2024 oqý jylynda AQSh-tyń joǵary oqý oryndarynda 210-nan astam elden 1,1 mıllıonnan astam halyqaralyq stýdent oqydy. Bul stýdentterdiń jalpy sanynyń shamamen 6 paıyzyn quraıdy.
Eske sala kenteıik, AQSh Gazadan kelgen azamattarǵa vıza berýdi ýaqytsha toqtatty.