AQSh 50 eldiń azamattaryna vızalyq kepil engizedi: soma 20 myń dollarǵa deıin jetýi múmkin
ASTANA. KAZINFORM – 3 tamyzdan bastap AQSh týrıstik jáne iskerlik B-1/B-2 vızasyn rásimdeıtin 50 eldiń azamattary úshin turaqty vızalyq kepil júıesin engizedi. Kepil somasy 20 myń dollarǵa deıin jetýi múmkin. Qazaqstan bul tizimge engen joq, dep habarlaıdy Kazinform.
AQSh Memlekettik departamentiniń málimetinshe, kepil somasyn árbir ótinishti qaraý kezinde konsýldyq qyzmetker jeke tártippen belgileıdi. Eger ótinish berýshi AQSh-tan belgilengen merzimde ketse, vızany paıdalanbasa nemese elge kirýge ruqsat ala almasa, kepil qarajaty tolyq qaıtarylady. Al vızalyq talaptar buzylǵan jaǵdaıda bul qarajat memleket paıdasyna ustalyp qalady.
Jańa talaptar AQSh bıliginiń deregi boıynsha vızalyq rejımdi jıi buzyp, elde ruqsat etilgen merzimnen artyq qalatyn memleketterdiń azamattaryna qatysty qoldanylady. Tizimge Qyrǵyzstan, Tájikstan, Túrikmenstan, Grýzııa, Aljır, Angola, Bangladesh, Kambodja, Mońǵolııa, Nepal, Týnıs, Ýganda, Venesýela, Zımbabve jáne Afrıka, Azııa men Latyn Amerıkasynyń birqatar basqa elderi engizilgen.
AQSh Memlekettik departamenti bul tetik pılottyq baǵdarlama aıaqtalǵannan keıin turaqty negizde engizilgenin málimdedi. Buǵan deıin konsýldyqtar 5 myń, 10 myń nemese 15 myń dollar kóleminde kepil belgileýge quqyly bolǵan. Endi eń tómengi bekitilgen shek alynyp tastalyp, kepildiń eń joǵary mólsheri 20 myń dollarǵa deıin ulǵaıtyldy.
AQSh bıligi bul shara vızalyq rejımdi buzý jáne ımmıgratsııalyq emes vızalardy zańsyz paıdalaný jaǵdaılaryn azaıtýǵa yqpal etedi dep esepteıdi.
Amerıkalyq buqaralyq aqparat quraldarynyń habarlaýynsha, sońǵy aptalarda AQSh-tyń Immıgratsııa jáne keden qyzmeti (ICE) merzimi ótip ketken vızamen júrgen shetel azamattaryna qatysty baqylaýdy kúsheıtken. Málimetke sáıkes, keminde 15 áýejaıda osyndaı tekserýler júrgizilgen.
Aıta keteıik, AQSh-ta stýdenttik vıza sheteldikter úshin qymbattaýy múmkin ekeni habarlandy.
