AQSh 30 qyrkúıekke deıin áskerin Iraktan tolyq shyǵarady
ASTANA.KAZINFORM - Baǵdat pen Vashıngton halyqaralyq koalıtsııanyń Iraktaǵy áskerı mıssııasyn aıaqtaý merzimin rastady, sodan keıin ekijaqty yntymaqtastyq jańa formatqa kóshedi.
AQSh óz áskerin Iraktan 30 qyrkúıekke deıin tolyq shyǵarýdy kózdep otyr. Vashıngton bastaǵan halyqaralyq koalıtsııanyń áskerı mıssııasynyń aıaqtalý kúnin Irak premer-mınıstri Álı az-Zaıdı men AQSh Ortalyq qolbasshylyǵynyń qolbasshysy admıral Bred Kýper sársenbi kúngi kezdesý barysynda maquldady.
-30 qyrkúıek Iraktaǵy DAISh-pen kúres jónindegi jahandyq koalıtsııanyń áskerı mıssııasynyń jáne onyń kúshterin tolyǵymen shyǵarýdyń belgilengen jáne sońǵy aıaqtalý kúni bolady, - delingen Irak premer-mınıstri keńsesiniń málimdemesinde.
Associated Press agenttiginiń AQSh sheneýnigine silteme jasaı otyryp habarlaýynsha, Vashıngton belgilengen merzimge deıin áskerin shyǵarýdy aıaqtaýdy josparlap otyr. Alaıda, elde qansha AQSh áskeri qalatyny jáne olardyń qaıda ornalastyrylatyny áli belgisiz.
Irak sheneýnikteriniń aıtýynsha, amerıkalyq áskerdi qysqartý jáne Erbılden tehnıkalar shyǵarý úsh apta buryn bastalyp ketken.
Ótken jyly AQSh kúshteri Iraktyń basqa bólikterindegi bazalaryn tastap, Kúrd avtonomııalyq aımaǵyndaǵy oryndaryn saqtap qalǵan.
Baǵdat 1 qazannan bastap AQSh-pen qarym-qatynas egemendik pen ortaq múddelerdi qurmetteýge negizdelgen ekonomıkalyq jáne qaýipsizdik salasyndaǵy yntymaqtastyqqa kóshýi kerek dep málimdedi.
Mıssııanyń aıaqtalý kúni shildeniń ortasynda Álı az-Zaıdıdiń Vashıngtonǵa sapary kezinde de talqylandy.
Irak bıligi halyqaralyq koalıtsııanyń shyǵarylýyn qarý-jaraqqa memlekettik monopolııa ornatý josparlarymen baılanystyrady. Premer-mınıstr buǵan deıin 30 qyrkúıekti memlekettik emes qarýly toptardy qarýsyzdandyrýdyń sońǵy merzimi retinde belgilep, shetel áskeriniń ketýi olardyń óz qarýlaryn saqtaýǵa negiz bolmaıtynyn málimdegen. Al, Iran qoldaıtyn birneshe yqpaldy toptar qarýlaryn tastaýdan bas tartatynyn málimdedi, bul úkimet josparyn qıyndatýy múmkin.
AQSh áskerı kúshteri Irakqa 2003 jylǵy basyp kirýden keıin ornalasty. 2007 jylǵy operatsııalardan keıin amerıkalyq kontıngent 170 000 áskerden asty.
Sońǵy jyldary Irakta shamamen 2500 AQSh áskeri qaldy, olar jergilikti qaýipsizdik kúshterin jattyqtyrdy jáne DAISh-ke qarsy operatsııalar júrgizdi.
Osyǵan deıin Vashıngton men Baǵdad ekijaqty qarym-qatynastyń jańa formatyna kóshetinin rastaǵan bolatyn.
