AQSh 2030 jylǵa qaraı Aıda ıadrolyq reaktor salýdy josparlap otyr

ASTANA. KAZINFORM — AQSh-tyń Kólik mınıstri ári NASA-nyń ýaqytsha basshysy Shon Daffı osy aptada Aıda atom elektr stantsııasyn (AES) salý jumystaryn jedeldetý týraly bastamany jarııalamaq, dep habarlaıdy Politico.

Jańa dırektıva NASA-ǵa ónerkásiptik kompanııalardan 2030 jylǵa qaraı qýattylyǵy 100 kılovatt bolatyn ıadrolyq reaktordy iske qosýǵa qatysty usynystar suratýdy mindetteıdi. Bul — astronavttardy Aı betine qaıta qondyrý úshin mańyzdy qadam bolmaq.

Sonymen qatar, Daffı Halyqaralyq ǵarysh stantsııasynyń ornyn basatyn jańa nysandy jasaýǵa qatysty jumystardy da jedeldetýge shaqyrdy. Bul da NASA-nyń basym baǵyttarynyń biri sanalady.

 — Bul eki qadam AQSh-tyń Aı men Marsty ıgerý boıynsha áreketterin jedeldetýge yqpal etýi múmkin. Aıta keteıik, bul maqsattardy Qytaı da kózdep otyr, — delingen maqalada.

NASA alty aı ishinde keminde eki kompanııamen kelisimshart jasasýdy josparlap otyr. Agenttik jańa stantsııany 2030 jylǵa deıin orbıtaǵa shyǵarý nıetinde. Eger bul merzim saqtalmasa, turaqty basqarylatyn orbıtalyq stantsııaǵa tek Qytaı ǵana ıe bolýy múmkin.

Qazirdiń ózinde Axiom Space, Vast jáne Blue Origin sııaqty birqatar kompanııa óz jobalaryn usynǵan. Alaıda sońǵy aılarda kongressmender agenttiktiń bul kompanııalarǵa qajetti qarjyny tym baıaý bólip jatqanyn synǵa aldy.

Bul bastamalar burynǵy Tramp ákimshiliginiń ǵarysh salasyndaǵy josparlarymen de úılesip otyr. Buǵan deıin Aq úı 2026 jylǵa arnalǵan bıýdjette adam qatysatyn ǵaryshtyq mıssııalardy qarjylandyrýdy arttyrýdy, biraq basqa jobalar, sonyń ishinde ǵylymı mıssııalardy qarjylandyrýdy 50%-ǵa qysqartýdy usynǵan bolatyn.

Eske sala keteıik, buǵan deıin NASA qyzmetkerleriniń sany 20%-ǵa qysqaratyny habarlanǵan.