AQSh 2008 jyldan beri alǵash ret Bolıvııaǵa elshisin jiberedi

ASTANA. KAZINFORM — AQSh bıligi Bolıvııamen 2008 jyly úzilgen dıplomatııalyq qarym-qatynasty elshilik deńgeıinde qalpyna keltirýge nıetti, dep habarlaıdy Report.

Bul týraly Ońtústik Amerıka eliniń jańa prezıdenti Rodrıgo Pastyń ınaýgýratsııasyna La-Pasqa kelgen AQSh Memlekettik hatshysynyń birinshi orynbasary Krıstofer Landaý habarlady.

— Biz qarym-qatynasty elshilik deńgeıinde qalpyna keltiremiz. Men bul óte mańyzdy qadam dep sanaımyn jáne jaqyn arada elshilerdi taǵaıyndaı alamyz dep úmittenemin», — dep keltiredi basylym Landaýdyń sózin.

2008 jyly Bolıvııanyń sol kezdegi prezıdenti Evo Morales AQSh elshisi Fılıp Goldbergti oppozıtsııany qarjylandyrdy jáne tártipsizdikti qoldady dep aıyptady. Kóp uzamaı AQSh-tyń burynǵy prezıdenti Djordj Býshtyń ákimshiligi Bolıvııa elshisin Vashıngtonnan shyǵaryp jiberdi. Ol Bolıvııany esirtkiniń zańsyz aınalymyna qarsy kúres jónindegi halyqaralyq mindettemelerin elemeıtin el dep atady.

Rodrıgo Pas 8 qarashada Bolıvııanyń prezıdenti qyzmetine kiristi. Saılaý naýqany kezinde ol eldiń álemmen baılanysyn nyǵaıtý qajettigin aıtyp, AQSh-pen qarym-qatynasty qalpyna keltirý jáne aımaqtyq yntymaqtastyqty damytý qajettigin erekshe atap ótti. 

Aıta keteıik, Bolıvııadaǵy prezıdent saılaýynyń ekinshi kezeńinde senator Rodrıgo Pas 97,53% daýys jınap, jeńiske jetken bolatyn.