AQSh 1 tamyzdan bastap EO men Meksıka taýarlaryna 30% kedendik baj salyǵyn engizedi
VAShINGTON. KAZINFORM — AQSh prezıdenti Donald Tramptyń málimdeýinshe, 2025 jyldyń 1 tamyzynan bastap Eýropalyq Odaq pen Meksıkadan ákelinetin taýarlarǵa 30 paıyz kóleminde kedendik baj salyǵy salynady, dep jazdy TASS agenttigi.
AQSh prezıdenti Eýropalyq komıssııa tóraıymy Ýrsýla fon der Lıaıen men Meksıka prezıdenti Klaýdııa Sheınbaýmǵa joldaǵan resmı hattaryn kópshilikke jarııa etti.
– 2025 jyldyń 1 tamyzynan bastap AQSh-qa Eýropalyq odaqtan ımporttalatyn taýarlarǵa 30 paıyzdyq baj salyǵy engiziledi, bul salaaralyq bajdardan bólek qoldanylady, – delingen Aq úı basshysy Ýrsýla fon der Lıaıenge joldaǵan hatynda. Bul hat Tramptyń Truth Social paraqshasynda jarııalandy.
Sondaı-aq, Tramp dál osyndaı mazmundaǵy hatty Meksıka prezıdenti Klaýdııa Sheınbaýmǵa da joldaǵanyn kórsetti. Onyń aıtýynsha, Meksıka tarapy esirtki kartelderiniń AQSh aýmaǵyna taralýyna jáne fentanıldi zańsyz ótkizýdiń aldyn alýda jetkilikti sharalar qabyldamaǵan.
AQSh prezıdenti atap ótkendeı, eger EO men Meksıka óz taýarlaryn AQSh aýmaǵynda óndire bastasa, bul baj salyǵy alynyp tastalýy múmkin. Sonymen qatar, eger atalǵan elder AQSh engizgen 30 paıyzdyq baj salyǵyna jaýap retinde qarsy sharalar qabyldasa, Vashıngton bul elderdiń óz tarıfterin qanshalyqty kótergenine baılanysty qosymsha baj salyǵyn engizetinin eskertti.
2025 jylǵy 2 sáýirde Tramp 185 el men aımaqtyń ónimderine qatysty kedendik baj salyǵy engiziletinin jarııalaǵan bolatyn. Jalpyǵa ortaq 10 paıyzdyq tarıf 5 sáýirde kúshine endi, al jekelegen tarıfter 9 sáýirden bastap qoldanyla bastady. Sol kúni AQSh prezıdenti baj salyǵynyń keıbir bólikterin 90 kúnge toqtata turý týraly sheshim qabyldady. Bul ýaqytsha sheshim saýda kelissózderine baılanysty qabyldanǵanyn Aq úı túsindirdi. Osy kezeńde jalpyǵa ortaq 10 paıyzdyq tarıf saqtaldy.
27 maýsymda Tramp AQSh birqatar elderge aldaǵy ekijaqty saýda sharttary – ıaǵnı olardyń AQSh naryǵyna shyǵaratyn taýarlaryna qatysty tarıf mólsherlemeleri týraly shamamen apta jarym ishinde habarlaıtynyn naqtylady. Bul eskertýlerdi taratý jumystary sońǵy kúnderi bastalyp ketken.
Eske sala keteıik, Eýrokomıssııa prezıdenti AQSh engizgen baj salyǵyna qatysty óz jaýabyn bergen bolatyn.