Aqseleý qazaqy bolmystyń, qazaqy qundylyqtyń, ulttyq qundylyqtyń ne ekendigin boıyna darytqan, tereń bilimdi azamat edi - Q. Salǵarauly

Bul pikirdi búgin QR Ulttyq muraǵatynyń kórme zalynda belgili ǵalym, jazýshy, Qazaqstannyń eńbek sińirgen qaıratkeri, fılologııa ǵylymynyń doktory, professor Aqseleý Seıdimbektiń qujattyq jeke qorynyń ashylý rásiminde ǵalym-jazýshy Qoıshyǵara Salǵarauly bildirdi.

«Yrzyq nesibesi taýsylyp, ómirden ozǵan kez kelgen pendeniń tirlikte kim bolǵanyn, ne istep, ne tyndyrǵanynyń aıǵaǵy bolatyn, onyń ómirinen derekter beretin qujattar jáne kózkórgen zamandastarynyń estelikteri ózinen qalǵan murasy bolýy tıis. Aqseleýden baǵa jetpes mol mura qaldy», dep atap ótken Q.Salǵarauly sol muranyń shyp-shyrǵasyn shyǵarmaı, bir jerde jınastyryp, mazmun, mánine qaraı iriktep, júıelep, sóıtip, keleshek aqseleýtanýshylar arqyly halyq ıgiligine asyrýǵa múmkindik týǵyzǵan, Aqseleýdiń jeke qorynyń ashylý rásimin jasap otyrǵan muraǵattyń ujymyna, onyń jetekshisine shyn júrekten alǵysyn bildirdi.

«Aqseleý qalaı ómir súrýden buryn ne úshin ómir súrý kerek degendi erte túsingen azamat bolatyn. Sodan da bolar búkil maǵynaly ómirin óziniń aıqyn, belgilengen maqsatymen júzege asyrýǵa, qazaǵyna jan tánimen qyzmet etýge arnady. Aqseleý - búkil bolmysymen qazaqshyl. Aqseleý meniń túsinigimde keshegini búginge jalǵaǵan, kesheginiń kózi, búginginiń ózi. Aqseleýdiń basty eki qasıeti - shyn mánindegi qazaq uǵymdaǵy bilikti azamattyǵy. Bilik degen ananyń sútimen, atanyń tárbıesimen, ósken ortanyń ónegesimen boıǵa darıtyn ilim. Osy ilim arqyly Aqseleý qazaqy bolmystyń, qazaqy qundylyqtyń, ulttyq qundylyqtyń ne ekendigin boıyna darytqan. Aqseleý tereń bilimdi azamat edi. Sol atadan juqqan bilikti, halyqtan alǵan bilimi arqyly bekemdegen ol búkil qazaqtyń Aqseleýine aınaldy», dedi ǵalym óz sózinde.

Sondaı-aq aqyn Farıza Ońǵarsynova Aqseleý qazaq halqy úshin erekshe orny bar tarıhı tulǵa bolǵandyǵyn tilge tıek etti.

Kórmedegi qujattar qor ıesiniń shyǵarmashylyq baǵyttaryna baılanysty «Arman qanatynda», «Armanyn bilimmen bekemdegen», «Qarymdy qalamger», «Ǵalym-etnograf», «Biligine bilimi jarasqan», «Óresi bıik óner ıesi», «Hattar syr shertedi», «Tuǵyry bıik tulǵa» bólimderden turady. Sondaı-aq qalamgerdiń baspasóz betterinde jaryq kórgen maqalalarynyń, kitaptarynyń, povest, ocherk, áńgimeleriniń qoljazbalary jáne eńbekteriniń óz qolymen túzetilgen mashınkalyq nusqalary, fotoqujattary, elektrondyq jetkizgishtegi qujattar, qurmet gramotalary, alǵyshattar, ártúrli ǵylymı ataqtaryn, qyzmet laýazymdaryn rastaıtyn kýálikteriniń túpnusqalary qoıylǵan.

Sonymen qatar kórmede «Qurmet» ordeni, «Mádenıet qaıratkeri», «Qazaqstannyń eńbek sińirgen qaıratkeri», «Qazaqstan Respýblıkasy Memlekettik syılyǵynyń laýreaty», «Qazaqstan Respýblıkasynyń ǵylymyn damytýǵa sińirgen eńbegi úshin» belgileri de qoıylǵan.

Qujattyq jeke qorda 1961-2009 jyldar aralyǵynda jazylǵan 700 jýyq hattar jınaqtalǵan. Sonyń ishinde kórmede Á. Marǵulan, M. Ǵabdýllın, L. Gýmılev, Ǵ. Músirepov, A. Toqmaǵambetov, Á. Tájibaev, Ǵ. Ormanov, O. Bókeı, J.Ábdihalyq, I.Tasmaǵambetov syndy memleket jáne qoǵam qaıratkerlerinen, aqyn-jazýshylardan, áriptesterinen kelgen 20-ǵa jýyq hattar oryn alǵan.