Aqsaılyq jigit Ulybrıtanııada modeldik jumysqa kiristi
ORAL. QazAqparat - Aqsaılyq Berik Qasymjanov jýyrda Ulybrıtanııa astanasy Londonda «First model management» agenttigimen kelisimshartqa qol qoıdy, dep habarlaıdy «QazAqparat» tilshisi.
Berik model retinde qazirdiń ózinde katalogtar men jýrnaldar úshin birneshe sýretke túsip úlgerdi. «Mundaı túsirilimder úshin keıde kúnine 6-7 ret kastıngten ótýge týra keledi. Bul jumys sonysymen qıyn da qyzyqty», deıdi ol.
Shyny kerek, Berik Qasymjanov o basta model bolamyn dep oılaǵan joq. Bári 2012 jyly Sıngapýrda «Elite Model Look» ulttyq baıqaýyna qatysýdan bastaldy.
Aqsaıdaǵy mektepti 2010 jyly bitirgennen keıin Berik ýnıversıtetke «Aýdarma isi» mamandyǵy boıynsha oqýǵa tústi. Birinshi kýrstan keıin kóptegen turǵylastary sekildi Amerıkada «Work and Travel» baǵdarlamasy boıynsha jumys jasap kórýge bekindi. Kelesi jyly «Education First» baǵdarlamasy boıynsha Amerıkaǵa oralǵysy kelgen, biraq vızalyq máselelerge baılanysty jol túsken joq. Barlyq shyǵyndar tólenip qoıǵannan keıin til úıretý mektebi Sıngapýrdy usyndy. Dál sol kezde «Elite Model Look» baıqaýyna irikteý bastalyp jatty. Mundaı múmkindikti qalt jibermegen Berik birinshi orynǵa ıe bolyp, jergilikti sán agenttigimen kelisimge qol qoıdy. Keıin elge oralyp, ýnıversıtet dıplomyn alǵannan keıin ol portfolıo máselesimen túbegeıli aınalysty.
Aqsaılyq jigitti Almaty, Astana, Sıngapýr, Shanhaı, Gonkong, Mılan, London qalalarynyń fotograftary san qyrynan sýretke túsirip úlgerdi. Mysaly, ol 2017 jyly kóktemde Almatyda Mercedes-Benz sán aptalyǵy aıasynda belgili dızaıner Leonıd Jerebtsovtyń kollektsııalyq kórmesine, al jazda Mılanda sondaı shara barysynda «Malibu.1992» brendi kıimderiniń kórsetilimine qatysty. Beriktiń qatysýymen Style Story sýretteri MMSCENE (Male Model Scene) ınternet jýrnalynda jarııalandy.
«Árıne, sán bıznesinde básekelestik óte joǵary. Onda eshkim seni aıamaıdy. Naqty tabysqa qol jetkizý úshin tabandylyq, sondaı-aq otbasy tarapynan qoldaý kerek. Meni ata-anam men baýyrym Alfııanyń qoldaýy árdaıym jigerlendirip, jeńisterge jetelep keledi», dedi Berik Qasymjanov.
