Aqsaıdaǵy óndiris oshaqtary qala syrtyna shyǵarylatyn bolady
ORAL. QazAqparat - Aqsaı qalasyndaǵy óndiris oshaqtaryn shahar syrtyna shyǵarý kózdelýde. Bul týraly búgin Óńirlik kommýnıkatsııalar qyzmetinde Bórli aýdanynyń ákimi Aldııar Halelov málim etti, dep habarlaıdy «QazAqparat» tilshisi.
Onyń aıtýynsha, qala ishinde ornalasqan asfalt zaýyty sekildi óndiris oryndary turǵyndardyń ókpe-renishin týǵyzýda. Sondyqtan aldaǵy ýaqytta aýdannyń bas josparyna ózgerister engizilip, óndiris oryndarynyń orny men aýmaǵy naqtylanatyn bolady. Budan bólek damý deńgeıi joǵary Pýgachev, Jarsýat, Keńtúbek, Prıýral, Kırov aýyldarynyń bas josparyn jasaý oılastyrylýda.
Sondaı-aq baspasóz máslıhatynda atap ótilgendeı, aýdanda Berezov, Bestaý aýyldarynyń turǵyndaryn baspanamen qamtý jumystary aıaqtalý ústinde. Qazirgi tańda Aqsaıǵa irgeles Araltal aýylyndaǵy 100 úıdiń qurylysy tolyqtaı bitip, turǵyndardy kóshirý jalǵasýda. Kúni búgin 92 otbasyǵa páter kilti tapsyrylyp, sonyń 62-si qonystanyp úlgerdi. Jýyrda Aqsaı qalasyndaǵy 9 qabatty eki turǵyn úıdiń qurylysy márege jetse, turǵyndardy kóshirý 15 qazanǵa deıin aıaqtalmaq.
Aıta keteıik, aýdannyń bıylǵy bıýdjeti - 10 mlrd teńge. Segiz aıda memlekettik bıýdjetke salyq túrinde 78,6 mlrd teńge jınaldy. Negizgi kapıtalǵa 92,9 mlrd teńge ınvestıtsııa qosylsa, ónerkásip óniminiń kólemi 1044,6 mlrd teńgege jetti. Aýyl sharýashylyǵy ónimi kólemi 866,6 mln teńgeni qurap, ótken jylǵydan 9,9 paıyzǵa kóbeıdi.
