Aqsaıda úsh jasar ul bala toǵyzynshy qabattan qulap ketti
AQSAI. QazAqparat - Aqsaı qalasynda toǵyzynshy qabattyń balkonynan úsh jasar ul bala qulap ketti, dep habarlaıdy QazAqparat tilshisi.
Batys Qazaqstan oblysynyń Densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqys oqıǵa keshe bolǵan.
2015 jylǵy (3 jas 7 aı ) bala birden Bórli aýdandyq ortalyq aýrýhanasynyń jansaqtaý bólimine jatqyzyldy.
Telefon arqyly oblystyq kópbeıindi balalar aýrýhanasynyń hırýrginen keńes alyndy.
«Balanyń jaǵdaıy óte aýyr, es-tússiz bolǵandyqtan, tasymaldaýǵa kelmeıdi. Sondyqtan quramynda balalar neırohırýrgy, hırýrgy jáne reanımatology bar sanavıatsııa brıgadasy Aqsaıǵa attandy», - dedi QazAqparat tilshisine A.Saqposynova.
