Aqsaıda toǵyz qabatty úıdiń qabyrǵasynda Abaı beınelendi

ORAL. QazAqparat – Aqsaı qalasynda toǵyz qabatty úıdiń qabyrǵasyna uly Abaıdyń sýreti salyndy, dep habarlaıdy QazAqparat tilshisi.

Mýraldyń janyna adamzatty adaldyqqa, izgilik ataýlyǵa shaqyratyn aqyn óleńiniń joldary jazylǵan.

Kompozıtsııanyń ashylý rásimine qatysqan aýdan ákimi Mırjan Satqanov Abaıdyń 175 jyldyǵyna oraı 175 is-sharanyń jyl sońyna deıin jalǵasatynyn jetkizdi.

Atalmysh sharaǵa QR Sybaılas jemqorlyqqa qarsy is-qımyl agenttiginiń BQO boıynsha departamenti bastamashy boldy.

«Abaıdyń «Paıda oılama, ar oıla» degen sózi qazirgi tańda da mán-mańyzyn joıǵan joq. Aldaǵy ýaqytta turǵyndardy adal ómir súrýge úndeıtin mýraldar men bılbordtar basqa aýdandarda da boı kóteredi. Uly tulǵalarymyzdyń danalyq sózderi keıingi urpaqqa oı salyp, adaldyqtyń aq jibin attamaýyna septesetin bolady», dedi departament basshysynyń birinshi orynbasary Nurdáýlet Sámet.

«Aqjaıyq – adaldyq alańy» jobasy aıasynda salynǵan mýraldyń demeýshileri – «RENKO» jáne «Aıala» JShS. Uly aqynnyń beınesin salýǵa Darıa jáne ıAkov Poleşýk 15 kún ýaqytyn jumsaǵan. Abaıdyń jan dúnıesin, ishki tolǵanysyn kórsetý úshin sýretshiler qoıý qanyq tústerdi kóbirek paıdalanǵan. Mýraldy túngi mezgilde jaryqtandyrý da qarastyrylǵan.

Endi qala turǵyndary men qonaqtary 10-shaǵynaýdannan Abaı beınesin kórip turatyn bolady.

Eske sala keteıik, budan buryn Aqsaıda kópqabatty úıdiń qabyrǵasyna Batyrhan Shúkenovtiń sýreti salynǵanyn jazǵan bolatynbyz.