Aqsaıda ózbekstandyq azamat qurylys nysanynda qaza tapty
ORAL. QazAqparat - 27 sáýir kúni saǵat 19.30 shamasynda 1988 jylǵy ózbekstandyq azamat Aqsaı qalasyndaǵy 10-shaǵynaýdanda salynyp jatqan 9 qabatty úıden qulap ketip, qaza tapqan, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, qaıǵyly oqıǵanyń oryn alýyna tehnıka qaýipsizdigin saqtamaý sebep bolǵan. Qaıtys bolǵan azamat 26 sáýir kúni el shekarasynan ótip, Qazaqstan Respýblıkasynda resmı túrde tirkelgen.
Qazirgi tańda atalǵan derekke baılanysty QR QK 156-baby 3-bólimine sáıkes tergeý amaldary júrgizilýde. Atalǵan qurylys nysanyn salyp jatqan qosalqy merdiger «Gýbınal» JShS ekendigi anyqtalyp, bul jóninde BQO boıynsha eńbek ınspektsııasy basqarmasyna habar berildi.
