Aqsaıda Qyzylorda oblysynyń turǵyny jerlesin pyshaqtap tastady
ORAL. QazAqparat – Aqsaı qalasynda Qyzylorda oblysynyń turǵyny jerlesin pyshaqtap tastady, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, oqıǵa 21 mamyr kúni shamamen saǵat 18.00-de boldy.
Qyzylorda oblysynyń 1993 jylǵy turǵyny 25 jastaǵy jerlesiniń qoly men keýde tusyna pyshaq suqqan.
«Atalǵan oqıǵa boıynsha QR QK 106-baby 1-bóligine (aýyr dene jaraqatyn keltirý) sáıkes tergeý amaldary júrgizilýde. Qazirgi kezde jábirlenýshi jansaqtaý bóliminen palataǵa aýystyryldy.
Osy oqıǵaǵa baılanysty áleýmettik jelide Aqsaı qalasynyń 4-shaǵynaýdanynda er adamnyń jynys múshesin kesip tastaǵany jóninde jalǵan aqparat taralýda. Bul aýdıojazba shyndyqqa sáıkes kelmeıdi. QR QK 274-babyna sáıkes kórineý jalǵan málimet taratqany úshin qylmystyq jaýapkershilik qarastyrylǵanyn turǵyndar esine salamyz», dep habarlady vedomstvodan.
Eske sala keteıik, budan buryn Oralda kondıtsıoner ornatyp jatqan er adamnyń 9-qabattan qulap ketkenin jazǵan bolatynbyz.
