Aqsaıda kópqabatty úıdiń qabyrǵasyna Batyrhan Shúkenovtiń sýreti salyndy
ORAL. QazAqparat – Aqsaı qalasynda kópqabatty úıdiń qabyrǵasyna belgili ánshi Batyrhan Shúkenovtiń sýreti salyndy, dep habarlaıdy QazAqparat tilshisi.
Aýdan ákiminiń orynbasary Alpamys Kóshkinbaevtyń aıtýynsha, atalmysh jeti qabatty úı Halyqtar dostyǵy kóshesi boıynda ornalasqan.
Budan buryn Jeńistiń 75 jyldyǵyna oraı osy kóshedegi 9 qabatty úıdiń qabyrǵasyna Keńes Odaǵynyń Batyry, jazýshy Baýyrjan Momyshulynyń beınesi salynǵan edi.
Mundaǵy maqsat – el tarıhynda oryn alatyn belgili tulǵalarǵa qurmet kórsetý. Bıylǵy mereıtoılarǵa oraı mýral salý ıdeıasyn aýdan ákimdigi kóterse, jergilikti KIOS kompanııasy qarjylaı qoldaý kórsetti.
«Eki mýraldy da Unicorns dep atalatyn oraldyq qyz ben jigit saldy. Qalanyń ortalyq kósheleriniń boıynda turǵan beınelerdi Shyńǵyrlaý aýdany men Qarashyǵanaq kenishinen keletin kópirden túskende, negizgi jolmen keletinderdiń bári kóredi. Aldaǵy ýaqytta bul is jalǵasyn taýyp, buıyrsa, uly aqynymyz Abaıdyń beınesi de asqaqtap turatyn bolady», dedi QazAqparat tilshisine Alpamys Kóshkinbaev.
