Aqsaıda qala turǵynyn belgisiz bireý pyshaqtap ketti
ORAL. QazAqparat - Aqsaı qalasynda qandy oqıǵa oryn aldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, belgisiz bireý búgin tańǵy saǵat 05.00 shamasynda 5-shaǵynaýdandaǵy úıdiń kireberisinde (podezinde) qala turǵynyn pyshaqtap ketken.
Jedel járdem shaqyrtqanymen, ol oqıǵa ornynda qaıtys bolyp ketken. Marqumnyń denesi polıtsııa qyzmetkerlerine berildi.
Turǵyndardyń sózine qaraǵanda, marqum valıýta aıyrbastaýmen aınalysqan kórinedi.
Oqıǵa ornynda Oral qalasynan kelgen krımınalıster de jumys jasady.
BQO ishki ister departamentiniń baspasóz qyzmeti aqparattyń prokýratýramen kelisýge jiberilgenin, keıin beriletinin jetkizdi.
Foto: app.sm-news.ru
