Aqsaıda birneshe iri kásiporyndy qaıta qurý kózdelýde
ORAL. QazAqparat - Aqsaı qalasynda birneshe iri kásiporyndy qaıta qurý kózdelýde. Bul týraly turǵyndarmen eseptik kezdesýinde Bórli aýdanynyń ákimi Aldııar Halelov málim etti, dep habarlaıdy «QazAqparat» tilshisi.
Onyń aıtýynsha, «Aqsaı nan ónimderi kombınatynda» 24 myń basqa arnalǵan jáne soıý tsehy bar shoshqa kesheni bar. Sondaı-aq «Qazaqstan elevatory» jáne «Aqsaı taǵamdary» sút óńdeý zaýyty toqtap tur. Bıyl osy kásiporyndarda jańǵyrtý jumystary júrgizilmek.
Jalpy, Bórli aýdanynda 2018-2025 jyldary 6,5 mlrd teńgege 14 ınvestıtsııalyq jobany júzege asyrý josparlanýda.
Bıyl aýdanda 1292 gektar sýarmaly jerdi aýyl sharýashylyǵy aınalymyna qosý oılastyrylýda. Aqsaıda «Aqsaı adal et» kásiporny bazasynda 21 mln teńgege aýysymyna 15 iri qara malyn soıatyn modýldi tseh salynbaqshy. Pýgachev aýylynda «Amanat» sharýa qojalyǵy 600 basqa arnalǵan taýarly sút fermasyn qolǵa almaqshy. Basqa da joba-josparlar bar.
Memlekettik baǵdarlamalar nátıjesinde turǵyn úı qurylysy qarqyn alyp keledi. Ótken jyly 472 páter boı kóterse, bıyl bul jumys jalǵasady. Aqsaıda 120 páterlik otbasylyq úlgidegi jataqhana salynbaqshy. Osyndaı jataqhanalar aýyldarda da turǵyzylmaq. Sondaı-aq 2018 jyly Aqsaıda «Turǵyn úı qurylys jınaq banki» salymshylaryna arnalǵan úsh toǵyz qabatty turǵyn úı qurylysy bastalmaqshy.
Eseptik jıynǵa oblys ákiminiń orynbasary Igor Steksov qatysyp, Elbasy Joldaýyna sáıkes alda turǵan maqsat-mindetterdi atap kórsetti.
Aıta keteıik, oblystaǵy ákimder esebi 16 aqpan kúni Oraldaǵy Oqýshylar jáne jastar saraıynda ótetin óńir basshysy Altaı Kólginovtiń turǵyndarmen eseptik kezdesýimen túıindeletin bolady.
