Aqsaı sý stantsııasynyń qurylysy 2021 jyly bastalýy múmkin

ALMATY. QazAqparat – Almatynyń jeti shaǵyn aýdanynda sý jáne káriz jelilerin tartý jumystary júrip jatyr. Bul týraly onlaın brıfıng barysynda Naýryzbaı aýdany ákiminiń orynbasary Baǵlan Dándibaev aıtty, dep habarlaıdy QazAqparat tilshisi.

«Naýryzbaı aýdanynda kommýnaldyq ınfraqurylymdy jańǵyrtý, aýmaqtardy abattandyrý jáne turǵyn úı men áleýmettik nysandarda salý boıynsha aýqymdy jumystar bastaldy. Qolǵa alynǵan jobalardy júzege asyrý úshin 70 mlrd astam teńge bólindi. Onyń 1,6 mlrd teńgesi «Jumyspen qamtý jol kartasy 2020» baǵdarlamasy aıasynda qarastyrylǵan»,– dedi Baǵlan Dándibaev.

Sonymen qatar, ol aýdandy ortalyq sýmen jabdyqtaý jáne sý burýmen qamatamsyz etý úshin 2020 jyly bıýdjetten 30 mlrd teńgeden astam qarajat bólingenin atap ótti.

«Qala ákiminiń tapsyrmasyna sáıkes «shetsiz qala» qaǵıdaty boıynsha ótken jyldan bastap kommýnaldyq ınfraqurylym qurylysy boıynsha jumystar bastaldy. Qazirgi ýaqytta 7 shaǵyn aýdanda (Aqjar, Jaılaý, Qarǵaly, Quramys, Tastybulaq, Taýjoly, Shuǵyla) sý qubyry jáne káriz jelileriniń, Qarǵaly jáne Taýsamaly 2 shaǵyn aýdanynda sý tartý qurylystary júrip jatyr. Sondaı-aq, Aqsaı sý jınaý qurylystary men sý daıyndaý stantsııasynyń qurylysyn 2021 jyly saraptamanyń oń qorytyndysyn alǵannan keıin bastaýdy josparlap otyrmyz»,– dedi ol.

Atalǵan jumystar aldaǵy 3 jylda aıaqtalady.