Aqsaı qalasynda turǵyn úı órtenip, jalǵyz basty ana baspanasyz qaldy
ORAL. QazAqparat - Aqsaı qalasynda bir qabatty kóppáterlik turǵyn úı órtendi, dep habarlaıdy «QazAqparat» tilshisi.
BQO TJ departamentinen alynǵan málimetke qaraǵanda, 25 qańtar kúni saǵat 11.25-te Lıneınaıa kóshesi 38-úıdiń №4 páterinde órt bolǵany jóninde habar túsken. Dálizde tóbe jabyny, jeke zattar men jıhaz otqa oranǵan. Órt aýmaǵy 15 sharshy metrdi qamtyǵan. Zardap shekkender joq.
Saǵat 12.34-te beti qaıtyp, 13.30-da aýyzdyqtalǵan órttiń sebep-saldary, keltirilgen shyǵyn anyqtalýda.
Oral qalasynda turatyn erikti Ǵalııa Bekqojıevanyń aıtýynsha, 32 jasar jalǵyz basty ana úsh ulymen órt bolǵan páterdi jalǵa alyp turǵan. Áıeldiń ózi jumysta bolǵan, 12, 9 jáne 6 jastaǵy balalar sirińkemen oınaǵan kezde órt shyqqan. Sonyń saldarynan barlyq zattary, qujattary janyp ketken. Endi áıelge kórshilerine keltirilgen shyǵyndy da óteýge týra keledi. Qazirgi kezde baspanasyz qalǵan áıel eriktilerdiń kómegimen ýaqytsha jalǵa alǵan páterde turyp jatyr. Basqalaı da járdem kórsetilýde.
Kómek qolyn sozǵysy kelgender 8-747-762-04-32 telefonyna habarlasa alady.
Illıýstratsılyq foto
