Aqsaı qalasynda kóp qabatty turǵyn úı paıdalanýǵa berildi
ORAL. QazAqparat - Táýelsizdik kúnine oraı Aqsaı qalasynda kóp qabatty turǵyn úı paıdalanýǵa berildi, dep habarlaıdy «QazAqparat» tilshisi.
Onyń ashylý rásimine qatysqan oblys ákimi Altaı Kólginovtiń málim etkenindeı, eń ulyq, eń qasterli mereke qarsańynda Elbasynyń tapsyrmasyna sáıkes Aqsaıda bes qabatty, 75 páterlik úı iske qosylyp otyr. Bul mekenge Berezov aýylynan kóship kelgen turǵyndar da qonystanýda. Munyń bári - memleket qamqorlyǵynyń arqasy.
Bıyl óńirde «Nurly jer» baǵdarlamasy aıasynda Oral men Aqsaı qalasynda 14 kóp qabatty turǵyn úı boı kóterýde. Oǵan qosa segiz aýdanda 188 úı salynýda. Sonda 1700 otbasy jańa baspanaǵa kirmekshi.
Búgin sondaı-aq Bórli aýyly taza aýyz sýmen qamtamasyz etildi. Oblystyń barlyq aýdanynda 55 eldi mekendi aýyz sýmen qamtý úshin 11 mlrd teńge bólindi. Sonyń ishinde Bórli aýdanynda Bórli jáne Aleksandrov aýyldary ortalyqtandyrylǵan sý kózine qosyldy. Buryn turǵyndar qudyqtan nemese tasymaldap sý ishse, endi ondaı qıyndyqtan qutyldy. Sý qubyryn iske qosý kezinde germanııalyq sorǵydan basqa qazaqstandyq ónimder paıdalanylyp, jergilikti turǵyndar jumysqa tartyldy. Qazir Bórlide árqaısysy 500 tekshe metrlik eki sý qoımasy jumys jasap tur. Jalpy quny 515,461 mln teńge turatyn jobany bas merdiger «KazConstructionGroup» JShS ýaqtyly júzege asyrdy.
«Taza sý - densaýlyq kepili. Adam ómiriniń uzaqtyǵy osyǵan da baılanysty. Sondyqtan óńirdegi 55 aýyldyń ortalyqtandyrylǵan sý kózine qosylýy - úlken qýanysh. Munyń bári Elbasynyń saıasaty, Táýelsizdik pen el birligi arqasynda múmkin bolyp otyr. «Nurly jol», «Nurly jer» jáne basqa memlekettik baǵdarlamalardyń bári halyqtyń qamyn kózdeıdi», dedi Altaı Kólginov.
Bórli aýylyndaǵy nysandarǵa barlyǵy 1,5 mlrd teńge bólinip, sý qubyryna qosa mádenıet úıi kúrdeli jóndeýden ótkizildi, kósheler jaryqtandyrylyp, qatqyl tabandy jol tóseldi. Aldaǵy jyly sport kesheni iske qosylatyn bolady.
Oǵan qosa Keńtúbek aýylynda 50 oryndyq balabaqsha iske qosyldy. Qazirgi tańda oblysta 24 bilim nysany salynyp jatsa, sonyń ony - jeke balabaqshalar. Onnan astam mektep, basqa da bilim oshaqtary boı kóterýde. Sonyń biri - osy balabaqsha. Endi munda baldyrǵandar tárbıelenip, tárbıeshiler jumys jasaıtyn bolady. Óńirde mektepge deıingi tárbıemen qamtý 97 paıyzdan asyp otyr.
Aıta keteıik, Bórli aýdanynda bıyl 12,5 mlrd teńgege 57 nysan salynýda.
