Aqsaı qalasynda «Kondensat» AQ-nyń vahtalyq kesheni ashyldy

Bul shara kompanııanyń 20 jyldyq mereıtoıymen tuspa-tus keldi.

«Kondensat» kompanııalar toby dırektorlar keńesiniń tóraǵasy Valerıı Júnisovtiń aıtýynsha, kásiporyn endi joǵary sapaly «Eýro-5» standartyna sáıkes keletin joǵary sapaly benzın men dızel otyny syndy munaı ónimderin shyǵaratyn óńdeý zaýytyn salmaqshy. 44 oryndyq atalmysh jataqhana qurylysy 2011 jyldyń 16 maýsymynda bastalǵan bolatyn. Qurylystyń bas merdigeri «Nafta» saýda úıi, qosalqy merdigeri «StroıVırtýozPlıýs» JShS. Qurylysshylar bir jyldaı ýaqyt ishinde qajetti ınfraqurylymdarmen qamtylǵan, avtoturaǵy, demalys aımaǵy bar zamanaýı qos qabatty vahtalyq keshendi salyp bitirdi. Onyń birinshi qabatynda eki adamdyq 14 bólme ornalassa, ekinshisinde «lıýks» klasty bir adamdyq tórt bólmeniń ádemiligi kóz tartady. Munda shaǵyn ashana bar, ǵalamtor, spýtnıktik telearna ornatylǵan. Sondaı-aq bul qabatta bir adamdyq 11 bólme de oryn tepken. Bólmelerdiń barlyǵy da janǵa jaıly.