Aqsaı qalasynda qoqys konteınerleri ýaqtyly tazartylmaı otyr
ORAL. QazAqparat - Aqsaı qalasynda qoqys konteınerleri ýaqtyly tazartylmaı otyr, dep habarlaıdy QazAqparat tilshisi.
Turǵyndardyń áleýmettik jelilerde málim etkenindeı, qalanyń keıbir shaǵynaýdandarynda qoqys asyp-tógilip jatyr.
Aqsaı qalasynda 40 myńdaı halyq turady.
Qala kóshelerinde 618 jáshik qoıylsa, sonyń bes júzi - jaı, qalǵan 120-ǵa jýyǵy - eýrokonteınerler. Bul konteınerlerdi tazartý úshin arnaıy manıpýlıatorlar kerek. Qala tazalyǵyna jaýapty mekeme «Aqsaı Tazalyq KZ» JShS-nyń ózinde mundaı tehnıka joq. Sondyqtan olar jalǵa alǵan tehnıkaǵa qarjy tóleı almaǵannan keıin 28 jeltoqsannan bastap atalmysh konteınerlerden segiz kúndeı qoqys shyǵarýdy toqtatqan.
Atalǵan JShS-dan alynǵan málimetke qaraǵanda, munyń basty sebebi - turǵyndardyń «Aqsaı Tazalyq KZ» JShS aldyndaǵy qaryzy kóbeıip, 10 mln teńgege jetkendigi. Bylaısha aıtqanda, qala turǵyndarynyń 25 paıyzy ǵana qoqys aqysyn tólep otyr.
Turǵyndar dabyl qaqqannan keıin bul máselege sońǵy kúnderi basa kóńil bóline bastady.
Qalany qoqystan tazalaý jumystaryna endi páter ıeleri kooperatıvteri de kúsh salmaq. Aqsaı qalasynyń ákimi Amangeldi Toǵyzbaevtyń sózine qaraǵanda, «Aqsaı tazalyq KZ» JShS basshylyǵy qalalyq PIK tóraǵalarymen máseleni birlesip sheshý joldaryn izdestirip kórmekshi.
Sonymen qatar buryn turmystyq qaldyqtardy shyǵarý úshin ár páterden 500 teńgeden jınalyp kelse, ótken jyly zańnama talaptaryna sáıkes baǵa ózgertilgen. Endi sol úıde turatyn ár adam basyna 211 teńge 67 tıynnan tólenedi. Bul da turǵyndardyń bir bóliginiń narazylyǵyn týǵyzyp otyr.
Feısbýk áleýmettik jelisindegi Just Aksay tobynda turǵyndar óz renishterin bildirip, qoqystyń sýretterin salýda.
