Aqsaı qalasynda eki jasar qyz bala káriz qudyǵyna batyp ketti
ORAL. QazAqparat - Aqsaı qalasynda 6 maýsym kúni saǵat 16.00 shamasynda eki jasar qyz bala káriz qudyǵyna batyp ketti, dep habarlaıdy «QazAqparat» tilshisi.
Bórli aýdandyq ishki ister bólimi jergilikti polıtsııa qyzmetiniń basshysy Aıbek Qaıyrǵalıevtyń aıtýynsha, búldirshin ájesimen birge serýendeýge shyqqan. Sodan keıin oınap júrip, mysyqtyń sońynan garajdarǵa qaraı júgirgen, sol jerde ashyq káriz qudyǵy bolǵan. Ony sol boıda izdep, TJ qyzmetkerlerin shaqyrǵan. Qudyqtan sýdy soryp alǵannan keıin qyz balanyń denesi shyǵarylǵan.
Sovet kóshesi, 97-mekenjaıynda turatyndardyń sózine qaraǵanda, atalmysh shuńqyr eshqashan jabylmaǵan, shóp ósip ketkendikten, birden baıqaý qıyn.
Eske sala keteıik, budan buryn 25 sáýir kúni Qaratóbe aýdany Sýlykól aýyldyq okrýgine qarasty Úshana eldi mekeninde 2013 jáne 2015 jylǵy qos sábı oınap júrip, jeke turǵyn úı monshasynyń septıgine túsip ketip, kóz jumǵan bolatyn.
