Aqsaı qalasynda eki avtokólik túıisip, júrgizýshi aýrýhanaǵa tústi
ORAL. QazAqparat – Aqsaı qalasynda eki avtokólik túıisip, júrgizýshi aýrýhanaǵa tústi, dep habarlaıdy QazAqparat tilshisi.
BQO polıtsııa departamentinen túsken málimetke qaraǵanda, oqıǵa 6 naýryz kúni shamamen 21.00-de Halyqtar dostyǵy kóshesindegi «Vıadýk» jol ótkelinde boldy.
«Toyota Croun» avtokóliginiń 25 jastaǵy júrgizýshisi joldyń jaǵdaıyn (jabysqaq qar) eskermeı, rýlge ıe bola almaı, qarsy betke shyǵyp ketip, 34 jastaǵy júrgizýshi aıdap kele jatqan GAZ-2705-254 kóligimen soqtyǵysýǵa jol bergen.
Sonyń saldarynan «Toyota Croun» júrgizýshisi túrli jaraqatpen Bórli aýdandyq ortalyq aýrýhanasynyń hırýrgııalyq bólimshesine jatqyzyldy. Jeńil kólikte otyrǵan 18 jastaǵy jolaýshy men GAZ-2705-254 avtokóliginiń júrgizýshisi dárigerler qaraǵannan keıin úılerine jiberildi.
Atalǵan derek Bórli aýdany polıtsııa bóliminde QR Ákimshilik quqyqbuzýshylyq kodeksi 610-baby 1-bóligine sáıkes tirkeldi.
Oblystyq densaýlyq saqtaý basqarmasy baspasóz qyzmetiniń naqtylaýynsha, túrli jaraqat alǵan júrgizýshi jeńil dárejeli mas kúıinde bolǵan. Hırýrgııalyq bólimshede emdelýde.
Eske sala keteıik, budan buryn Batys Qazaqstanda boranǵa baılanysty respýblıkalyq joldar jabylǵanyn jazǵan bolatynbyz.
