Aqsaı qalasynda páterdegi órt ornynan 58 jastaǵy er adamnyń múrdesi tabyldy
ORAL. KAZINFORM – Aqsaı qalasynda bes qabatty úıden órt shyǵyp, oqıǵa ornynan 58 jastaǵy er adamnyń múrdesi tabyldy.
BQO TJ departamentiniń baspasóz qyzmetinen málim etkenindeı, oqıǵa 18 maýsym kúni tańǵa taman boldy.
«Saǵat 04.31-de qalanyń 4-shaǵynaýdanynda kóp qabatty úıde órt bolyp jatqany jóninde habar túsken. Tórtinshi qabattaǵy páterlerdiń birinde aýmaǵy 20 sharshy metr asúı bólmesi otqa oranǵan. Órt ornynan páter ıesi – 1966 jylǵy er adamnyń denesi shyǵaryldy. Úıdiń besinshi qabatynan avtobaspaldaqtyń kómegimen 6 adam evakýatsııalansa, sonyń bireýi – bala. «Tilsiz jaý» saǵat 05.20-da oqshaýlanyp, 05.30-da aýyzdyqtaldy. Qazirgi kezde órttiń shyǵý sebebi, keltirilgen shyǵyn anyqtalý ústinde. Osyǵan deıin oblysta jyl basynan beri órt saldarynan 3 adam kóz jumǵan edi», - dep habarlady vedomstvodan.
Eske sala keteıik, budan buryn Oralda 59 jastaǵy er adamnyń ózine-ózi qol jumsaǵanyn jazǵan bolatynbyz.
