Aqsaı qalasynda mektep avtobýsy órtenip, júrgizýshi jaraqat aldy

ORAL. KAZINFORM — Bórli aýdany ortalyǵy Aqsaı qalasynda mektep janynda avtobýs otqa orandy. 

BQO TJD Bórli aýdany tótenshe jaǵdaılar bóliminiń bastyǵy Talǵat Temirǵalıevtiń málim etkenindeı, 21 sáýir kúni Araltal shaǵynaýdanynda PAZ avtobýsy janǵan. 

— Tilsiz jaý saǵat 17.40-ta oqshaýlanyp, 17.56-da aýyzdyqtaldy. Órttiń shyǵý sebepteri, keltirilgen zalal anyqtalý ústinde,  - dedi T.Temirǵalıev.

Bórli aýdany bilim berý bóliminiń málimetine qaraǵanda, avtobýs № 8 orta mektep syrtyndaǵy turaqta turǵan kezinde shamamen saǵat 17.25-te kapot astyndaǵy symdary tıip, órtengen. Oqıǵa ornynda oqýshylar bolǵan joq. Kólik júrgizýshisi oń qolynan jaraqat aldy. 

BQO densaýlyq saqtaý basqarmasy baspasóz qyzmetiniń naqtylaýynsha, oqıǵa ornyna jedel járdem brıgadasy jetken kezde er adamnyń zardap shekkeni anyqtaldy. Oǵan alǵashqy medıtsınalyq kómek kórsetilip, aýdandyq aýrýhananyń qabyldaý bólimine jetkizildi. Er adam 1 dárejeli kúıik alǵan, denesiniń 3 paıyzy zaqymdanǵan.

Eske sala keteıik, budan buryn Batys Qazaqstanda júk kóligi janyp ketkenin jazǵan bolatynbyz.