Aqsaı qalasynda qubyrǵa sý kirýi saldarynan 40 abonent gazsyz qaldy

ORAL. KAZINFORM — Bórli aýdany ortalyǵy Aqsaı qalasynda oqys oqıǵa boldy.

Aqsaı qalasy ákimdiginen málim etkenindeı, shaharǵa qarasty Araltal aýylyndaǵy J.Dosmuhamedov kóshesindegi turǵyn úılerde gaz berýdiń toqtaý sebebin anyqtaý maqsatynda aýdanda arnaıy komıssııa quryldy.

Komıssııa músheleri 11 naýryz kúni saǵat 21.00-den 23.00-ge deıin úılerdi aralap shyqty. 

Aralaý barysynda erigen qar sýynyń úılerge kirý derekteri rastalǵan joq. Páterlerdiń birinde aýyz sý qubyrynan sý aqqan. Sonyń saldarynan páterdi sý basqan. Sol kezde páterdi jalǵa alǵan adam úıinde bolmaǵan.

— Sýdyń tómen qysymdy magıstraldyq gaz qubyryna kirýi saldarynan 10 jeke turǵyn úıdegi 40 abonent gazsyz qaldy. Segiz jaldaýshy elektr jylytqysh surap, qamtamasyz etilse, qalǵandary qajet emestigine baılanysty bas tartty. Qurylys salýshy «Naztýr» JShS men «QazaqGaz Aimaq» AQ aýdandyq gaz qyzmeti apatty joıýǵa atsalysýda. Gaz berý 12 naýryz kúni saǵat 14.00-de qalpyna keltiriledi dep boljanyp otyr. Bul másele apat joıylǵansha Bórli aýdany ákimdiginiń baqylaýynda, — dep habarlady vedomstvodan.

Ákimdik málimetine qaraǵanda, bul páterler baspana kezeginde turǵan azamattarǵa ótken jyldyń jeltoqsan aıynda berilgen. Jol salý úshin smetalyq qujattama ázirlenip, jobany bıyl júzege asyrý josparlanýda. 

Eske sala keteıik, budan buryn BQO-da aýylǵa kireberiste avtokólikter batpaqqa batyp jatýyna baılanysty ákimdik jaýap bergenin jazǵan bolatynbyz.

Sondaı-aq Oral qalasynda aýla-kósheler qar sýyna tola bastady.