Aqsaı qalasynda ıt qapqan 5 jasar qyz aýrýhanaǵa tústi

ORAL. KAZINFORM – Batys Qazaqstan oblysy Aqsaı qalasynda qańǵybas ıt qapqan qyz aýrýhanaǵa jatqyzyldy.

Áleýmettik jeliden alynǵan málimetke qaraǵanda, qalanyń soltústik bóligindegi balalar alańy aýmaǵynda kishkentaı qyzǵa ıtter shabýyl jasaǵan. 

BQO densaýlyq saqtaý basqarmasynyń baspasóz qyzmetinen málim etkenindeı, 11 qazan kúni saǵat 11.40-ta Bórli aýdandyq aýrýhanasyna kóptegen jaraqatpen 5 jasar qyz jetkizilgen.

Travmatıkalyq shok belgileri bar ekendigin eskere otyryp, qyz bala jansaqtaý bólimine jatqyzyldy. 

«Qyzǵa aýyrsynýdy basatyn em jasalyp, jaraqatty alǵashqy hırýrgııalyq óńdeý júrgizildi. Sondaı-aq shuǵyl túrde sirespege qarsy egildi. Jansaqtaý bólimshesinde jatqan kezde qyzdyń jaǵdaıy turaqtalyp, hırýrgııaǵa aýystyryldy. Qazirgi kezde onyń jaǵdaıy turaqty aýyr. Tamaqty ózdiginen ishedi. Qozǵalady. Qyz bala qajetti emin alýda», - dep habarlady vedomstvodan.

Eske sala keteıik, budan buryn Batys Qazaqstanda 2 myńǵa jýyq adamnyń ıt pen mysyqtan zardap shekkenin jazǵan bolatynbyz.