Aqsaı qalasynda 90 jyldyq tarıhy bar vokzal kúrdeli jóndeýden keıin ashyldy
ORAL. KAZINFORM — Aqsaı qalasynda tolyq jańǵyrtylǵan «Qazaqstan» temirjol vokzalynyń saltanatty ashylý rásimi ótti. Іs-sharaǵa oblys ákimi Narıman Tóreǵalıev qatysyp, turǵyndardy mańyzdy ınfraqurylymdyq nysannyń paıdalanýǵa berilýimen quttyqtady.
Aımaq basshysy jobany sapaly ári ýaqytyly júzege asyrǵan merdiger kompanııa men qurylysshylarǵa alǵys aıtty.
— Memleket basshysy Qasym-Jomart Kemeluly Toqaevtyń tapsyrmasyna sáıkes táýelsizdik jyldary elimizde alǵash ret temirjol vokzaldaryn keń aýqymdy jańǵyrtý baǵdarlamasy júzege asyrylyp jatyr. Ótken jyly «Qazaqstan temir joly» ulttyq kompanııasynyń tapsyrysymen óńirdegi 4 temirjol nysanyn jańǵyrtý bastaldy. Kúni keshe jańadan salynǵan Semıglavyı Mar stantsııasyn ashsaq, búgin ekinshi beketti paıdalanýǵa berip otyrmyz. Bul jumystar óńirdiń áleýmettik-ekonomıkalyq damýyna, iskerlik belsendilikti arttyrýǵa jáne týrıstik áleýetin nyǵaıtýǵa oń áser etedi, — dedi Narıman Tóreǵalıev.
90 jyldyq tarıhy bar «Qazaqstan» vokzalyn jańǵyrtý jumystary aıasynda ǵımarat tolyq jańartylyp, zamanaýı sáýlettik kelbetke ıe boldy. Sonymen qatar 2 perron men vokzal mańyndaǵy kópir qalpyna keltirilip, ınjenerlik ınfraqurylym jelileri jańartyldy. Aınala abattandyrylyp, jolaýshylar úshin qolaıly jaǵdaı jasaldy.
Aıta keteıik, buǵan deıin Tasqala aýdanyndaǵy 110 jyldyq tarıhy bar Semıglavyı Mar stantsııasy da kúrdeli jóndeýden keıin paıdalanýǵa berilgen bolatyn.
