«Aqsaqaldar keńesi ataly sóz aıtatyn bedeldi ınstıtýt bola ala ma?» - respýblıkalyq basylymdarǵa sholý

***

«Іskerlik forým iri jobalarǵa bastaıdy». «Egemen Qazaqstan» gazetiniń búgingi sanynda osy taqyryppen jaryq kórgen maqalaǵa Úkimetbasy Kárim Másimovtiń Belarýs Respýblıkasyna jumys sapary arqaý bolǵan. «Keshe Qazaqstan Úkimetiniń basshysy Kárim Másimov Belarýs Respýblıkasynyń Premer-Mınıstri Sergeı Sıdorskıımen keńeıtilgen ekijaqty kezdesý ótkizdi. Kezdesý barysynda taraptar eki el arasyndaǵy saýda-ekonomıkalyq baılanysty odan ári damytý máseleleri týraly jan-jaqty pikir almasty», dep jazady basylym. Premer-Mınıstrdiń sapary jaıynda basylymnan egjeı-tegjeıli oqı alasyzdar.

Sonymen qatar Úkimet basshysynyń sapary jaıynda «Kazahstanskaıa pravda» gazetinde de kólemdi maqala basyldy.

«Egemen Qazaqstan» gazetiniń juma kúngi nómirinde Qyrǵyzstan ýaqytsha úkimetiniń tóraıymy Roza Otýnbaevanyń málimdemesi jaryq kórdi. Onda «Qazaqstannyń Qyrǵyzstanmen shekarasy Prezıdent Nursultan Nazarbaevtyń saıası erik-jigeriniń arqasynda ashyldy. Endi Qyrǵyzstannyń ekonomıkasy qaıta silkinip, saýda aǵyny jańǵyrady. Biz belgilengen ekonomıkalyq parametrlerge shyǵýdy josparlap otyrmyz. Halyqaralyq uıymdar ókilderiniń bizderdi qazirgi kem-ketikterdi jabý úshin qarjy jaǵynan jan-jaqty qoldaýǵa daıyn ekendikterine sendirgeni atap ótýge turarlyq», delingen.

«Keshe Parlament Májilisiniń Tóraǵasy Oral Muhamedjanovtyń jetekshiligimen osy palatanyń jalpy otyrysy bolyp ótti. Onda dástúr boıynsha depýtattar birqatar laýazym ıelerine saýaldaryn joldady», dep jazady «Egemen Qazaqstan» gazeti. Basylymnyń baıandaýynsha, munaı tasymaldaý kompanııalarynyń magıstraldyq munaı qubyrjoldarynyń kúzetin kúsheıtý sharalary qoldanylǵanyna qaramastan, jaǵdaı nasharlaı túsýde. Qolda bar málimetterge qaraǵanda, munaıdyń zańsyz aınalymy salasynda turaqty uıymdasqan qylmystyq toptar qalyptasqan. Olardyń ótkizý arnalary, suǵyna qosylýdy jáne ony búrkemeleýdi júzege asyratyn, munaıdy aǵyzý (quıý) jáne ony avtomobıl kóligimen tasymaldaý jónindegi mamandary bar. Osyǵan baılanysty zań jobasynda munaıdy zańsyz tasymaldaý, satyp alý, ótkizý, saqtaý, qaıta óńdeý úshin ákimshilik jáne qylmystyq jaýapkershilik belgileý, sondaı-aq munaı-gaz qubyr joldarynan munaıdy urlaǵany, qylmystyq jolmen alynǵan munaıdy satyp alǵany jáne ótkizgeni úshin qylmystyq jaýapkershilikti qatańdatý usynylyp otyr. bul jaıynda basylymnyń búgingi nómirindegi «Munaı ónimderine baqylaý kúsheıtilýi tıis» degen maqaladan keńinen oqýǵa múmkindikterińiz bar.

***

«»Jaqynda Eýropa keńesi Parlamenttik assambleıasy Keńes Odaǵy respýblıkalarynda 30-shy jyldary bolǵan jappaı ashtyq qurbandaryn eske alý týraly qarar qabyldap, ashtyqty keńes rejiminiń óz halqyna qarsy jasaǵan qylmysy dep tanydy. Biz qoldan jasalǵan tragedııany saıasılandyrmaǵan kúnniń ózinde buǵan aıypkerdi jasqanbaı, aıqaılap aıtýǵa tolyq qaqymyz bar. Ókinishke qaraı, qasiretti oqıǵalarǵa laıyqty saıası baǵa berýden buryn, taǵylym alý úshin ulttyq aýqymda atap óte almaı kelemiz», dep jazady «Alash aınasy» gazeti búgingi nómirinde basylǵan «Rejimdi kinálaý az, saıası baǵa kerek» degen maqalasynda. Sondaı-aq jarııalanymda osy jaıtqa oraı birqatar elge tanymal azmattardyń pikirleri qosa berilgen.

«Alash aınasy» gazetiniń dástúrli «Oı-kókpar» aıdarynyń búgingi qoıar saýaly - «Aqsaqaldar keńesi ataly sóz aıtatyn bedeldi ınstıtýt bola ala ma?». Osy saýalǵa jaýap bergen QR Parlamenti Májilisiniń depýtaty Amangeldi Momyshev «Ortalyq Azııa memleketterine qaraǵanda, bizdiń eldiń ekonomıkalyq, áleýmettik jáne saıası ahýaly turaqty. Eger aqsaqaldar alqasy qurylatyn bolsa, bılik eldiń ishki máselelerinde keńesip otyratyn jáne qulaq asatyn bedeldi ınstıtýt bola alady dep oılaımyn. Sebebi bıliktiń ózi aqsaqaldar keńesiniń qurylýyna múddeli bolyp otyr», dese, fılosofııa ǵylymdarynyń doktory, professor Amangeldi Aıtaly «Qurylaıyn dep otyrǵan aqsaqaldar keńesi shyn máninde ataly sóz aıtatyn bedeldi ınstıtýt bolady degenge kúmánim bar. Eger bul keńes qurylyp, quramyna burynǵy kózqarastaǵy kommýnıstik partııanyń shekpeninen shyqqandar engiziletin bolsa, onda bul keńesten qandaı ataly sóz kútýge bolady? Assambleıa músheleriniń aqsaqaldar keńesine múshe bolyp ınstıtýttyń bedelin arttyrady degenge de sený qıyn. Sebebi Táýelsizdik alǵan ýaqyttan beri olardan qoǵamǵa qajetti, elge kerek erekshe usynys aıtqanyn estigen emespin. Aqsaqaldardyń ishinde de halyqtyń aldynda bedeli bar, bılikke de kez kelgen máseleni ashyq aıta alatyn Salyq Zımanov sııaqty aqsaqaldar bar. Biraq mundaı azamattar oǵan múshe bola ma másele sonda», depti.

***

«Taıaýda ǵana «tamyzǵa deıin úlgerińder» dep el halqyn Jeke ıdentıfıkatsııalyq nómir alýǵa asyqtyryp edik, resmı bılik atalmysh nómirdi qoldanysqa engizý merzimin keıinge qaldyryp otyr. Bir aı, tipti bir jylǵa da emes, jańa júıe 2012 jyly qańtardyń 1-inen bastap qana qoldanysqa enetin boldy», dep jazady «Aıqyn» gazeti. Basylymnyń atap ótýinshe, mundaı sheshim Úkimetbasy K.Másimovtiń sáýirdiń 28-inde ótkizgen jıyny barysynda qabyldanypty. Alaıda BAQ qulaǵyna endi ǵana jetip otyr.

«Aıqyn» gazetiniń dástúrli «Aq sóıle!» aıdarynyń búgingi qonaǵy - Jambyl oblysy ákimdiginiń tabıǵı resýrstar jáne tabıǵatty paıdalanýdy retteý basqarmasy bastyǵynyń orynbasary Dáýlet Asambekov. «Sý sharýashylyǵy nysandarynyń menshik túrin kommýnaldyq jáne respýblıkalyq dep bólý durys emes» degen taqyryppen berilgen ekeýara áńgimeniń tolyq nusqasyn basylymnyń juma kúngi sanynan tolyq oqı alasyzdar.

Budan buryn BAQ-tarda Májilis depýtaty Zaǵıpa Bálıevanyń Іle Alataýynyń shyńyna ornalasqan, Mánshúk Mámetova atyndaǵy kólden Almatyǵa qaýip tónip turǵanyn aıtyp, kóldiń sýyn tez arada aǵyzý týraly másele kóterip, Úkimet basshysy K.Másimovke suraý salǵandyǵyn jazǵan bolatyn. «Aıqyn» gazetiniń jazýynsha, Almaty qalasynyń ákimi Ahmetjan Esimov tiushaqpen atalǵan kóldiń jaǵdaıyn kózben kórip, qaýipti eshteńeni baıqamaǵan. «Mamandardyń pikirinshe, qazir mundaǵy muzdy-qardyń qalyńdyǵy 80 santımetrden asyp tur. Kóldiń muz qursaýy tek maýsym aıynyń ortasynda ǵana birtindep jipsýi múmkin», dep jazady basylym.

***

«Lıter» gazetiniń jazýynsha, taıaý aralyqta Qaraǵandy oblysynda ushaqtar shyǵaryla bastamaq. Olar aýyl sharýashylyǵy qajettiligine paıdalanylatyn bolady. Kelesi jyldyń ózinde «Fermer-2» jáne «Fermer-500» ushaqtary áýege kóteriledi dep kútilýde. «Aýyl sharýashylyǵyna mamandandyrylǵan ushaqtar serııasyn shyǵarýdy uıymdastyrý» dep atalatyn ınnovatsııalyq jobalar qazaqstannyń 2010-2014 jyldarǵa arnalǵan údemeli ındýstrııalyq-ınnovatsııalyq damý memlekettik baǵdarlamasy aıasynda júzege asyrylady.