Aqparattyq júıeni tıimsiz paıdalanǵan basshy jazalanady

ASTANA. QazAqparat - Qazaqstanda aqparattyq júıeni tıimsiz paıdalanǵany úshin birinshi basshyǵa jaýapkershilik qatańdatylmaq. Bul jaınyda búgin Úkimettiń selektorlyq rejimdegi otyrysynda QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat.

«Buǵan deıin aqparattyq júıeni paıdalaný bir krıterıı boıynsha ǵana júrgizildi. Ol boıynsha nebári eki kórsetkish baǵanalandy. Memleket basshysynyń tapsyrmasyn eskere otyryp, atalǵan baǵalaý boıynsha memlekettik organdardyń birinshi basshylarynyń jaýapkershiligin arttyrý usynylady. Buǵan qosa, engizilgen aqparattyq júıeni birinshi kezekte memlekettik organdardyń basshylarynyń paıdalaný máselesi tur», - dedi Abaev.

Onyń aıtýynsha, Memlekettik qyzmet isteri agenttigimen birge ázirlengen memlekettik organdardyń uıymdyq damý tıimdiligin baǵalaý ádisiniń úsh sanaty bar.

«Birinshisi - bul memlekettik qyzmetti kórsetý úshin paıdalanylatyn aqparatty júıe. Ekinshisi - memlekettik organdardyń qyzmetin avtomattandyrý úshin qoldanylatyn aqparattyq júıe. Úshinshisi - sáýlettik portaldarda tirkelgen aqparattyq júıelerdiń úlesi», - dedi mınıstr.

Dáýren Abaevtyń sózine qaraǵanda, 2016 jyldan osy ýaqytqa deıingi baǵalaýdyń nátıjesinde memlekettik qyzmetshilerdiń 32 paıyzy aqparattyq júıe ınterfeısiniń qyzmetin túsinbeıtindigi anyqtalǵan.