Aqparattyq tehnologııany oqý baǵdarlamasyna engizý - sapaly bilim alýdyń jáne jemqorlyqtyń aldyn alýdyń eń tıimdisi - R. Alshanov
ALMATY. 18 qarasha. QazAqparat /Názıra Eleýhan/ - Joǵary oqý oryndarynda jemqorlyqpen kúresýdiń jaqsy tájirıbesi jınalǵan.
Onyń ishinde aqparattyq tehnologııany oqý baǵdarlamasyna engizý, ınternetke qosylyp, qashyqtyqtan bilim alý júıesi bar. Mundaı tehnologııa barlyq JOO-larǵa engizilse, stýdentter úshin múmkindikter artady, oqytýshyny tańdaı alady, tosqaýyldar azaıady, daryndy balalarǵa jol ashylady, ár balanyń naǵyz bilim alýyna múmkindik jasalady, jemqorlyq azaıady, qoǵamda para berý arqyly oqýdy bitirip dıplom alýǵa bolady degen pikir joǵalady. Bul týraly búgin ál-Farabı atyndaǵy QazUÝ-de joǵary oqý oryndaryndaǵy sybaılas jemqorlyqpen kúres joldaryn talqylaýǵa arnalǵan jıyn barysynda Respýblıkalyq JOO-lar qaýymdastyǵynyń tóraǵasy Rahman Alshanov aıtty.
Onyń paıymdaýynsha, oqýǵa kelgen stýdent bilimdi, básekege qabiletti maman ıesi bolyp shyǵý úshin kelgendigin túsinýi qajet. "Qazaq Ulttyq ýnıversıtetine kelgen ár stýdent óz mektebinen kelgen eń daryndy, talantty, talapty oqýshylar. Sol sııaqty basqa da JOO-ǵa túsýshiler sondaı daryndy balalar dep bilemiz. Biz sondyqtan barlyq ýnıversıtet stýdentterine sapaly bilim alýlaryna jaǵdaı jasaýymyz qajet, jemqorlyqtyń aldyn kesý úshin osy aqparattyq tehnologııany oqý baǵdarlamasyna engizýimiz qajet. Bul baǵdarlama boıynsha oqıtyn stýdenttiń kórsetkishteri, bilimi, baǵasy bárine, ata-anasyna, oqý basshylyqtaryna aıdaı ashyq kórinip turady. Sondyqtan bul tájirıbeni nátıjeli dep aıtýǵa bolady. Qazir bir, eki ýnıversıtette jaqsy tájirıbe jınalǵan. Bizdiń maqsatymyz - osy tájirıbeni basqa JOO-ǵa jetkizý, engizý. Sońǵy 3-4 jyl ishinde aqparattyq tehnologııa, kompıýterdi engizý jaqsy qolǵa alynyp, alǵa basty. Qıyn kez artta qaldy, qazir jaǵdaı túzeldi, memleket tarapynan qoldaý ósti, ozyq tehnologııalarǵa kóńil bólý múmkinshiligi artty. Elimizde bilim salasy qarqyndy damyp kele jatyr", dep atap ótti ol.
Rahman Alshanov sonymen qatar, "syrttaı oqıtyn stýdentter úshin qashyqtyqtan oqytý júıesin barlyq oqý oryndaryna engizý kerek", dep atap ótti. "Ol eń aldymen "syrttaı oqıtyn stýdentter parany kóp beredi" degen pikirdiń joıylýyna yqpal etedi ári olar sapaly bilim ala alady. Qashyqtyqtan oqytý júıesiniń tıimdiligi, ol úıinde otyryp-aq bilim alady, ol ásirese sportshylarǵa, jumys isteı otyryp bilim alyp júrgenderge, balamen otyrǵandarǵa yńǵaıly. Búginde bul júıemen oqytý iske endi, ruqsat berildi. Qazir elimizdiń 28 joǵary oqý orny qashyqtyqtan oqytý júıesin engizdi", dedi R. Alshanov.
