Aqparattyq tehnologııalar ýnıversıtetiniń esepshisi 414 mln teńgeni urlaǵanyn moıyndady

ALMATY. QazAqparat – Almatyda Halyqaralyq aqparattyq tehnologııalar ýnıversıtetiniń burynǵy rektory Damır Shynybekov pen esepshi Janaıym Spabekovaǵa qatysty sot protsesi jalǵasyp jatyr, dep habarlaıdy QazAqparat tilshisi.

Ýnıversıtettiń burynǵy rektory Damır Shynybekov pen esepshi Janaıym Spabekovaǵa 1,7 mlrd teńgeni jymqyrdy degen aıyp taǵylǵan bolatyn.

Sot aldynda atalǵan ýnıversıtettiń esepshisi Janaıym Spabekova jaýap berip jatyr.

Sot suraýy kezinde Janaıym Spabekova 2013-2018 jyldar aralyǵynda 414 mln 790 myń teńgeni jymqyrǵanyn moıyndady. 2017 jyly 128,2 mln teńge alǵan.

Onyń aıtýynsha, bul aqshaǵa Nur-Sultan qalasynyń Esil aýdanynan bir páter satyp alǵan. Almatyda «Araı» turǵyn úıinen parkıngi bar 3 páter jáne «Nissan Qashqai», Toyota Hilux kólikterin satyp alǵan. Qostanaı oblysynda «Aıgúl balabaqshasy» JShS, «Torǵaı kópsalaly kolledji», «Torǵaı jylyjaıy» jáne «Aralbaı qaǵazy» kompanııalaryn satyp alǵan.

Qostanaı oblysy Torǵaı aýylynda 3 úı, 1 jer ýchaskesin alǵan. Kompanııalar men jyljymaıtyn múlikter baýyry men balasynyń atyna jazylǵan. Biraq ekeýi de bul dúnıe-múlik qandaı aqshaǵa kelgenin aıta almady.

Kelesi sot otyrysy erteń, ıaǵnı 11 naýryzǵa belgilendi.

Aıta ketý kerek, burynǵy rektorǵa qatysty QR QK 189-babynyń 4-bólimimen qylmystyq is qozǵalǵan edi. Damır Shynybekov ýnıversıtetke 2009 jyldan beri basshylyq jasaǵan.

2017 jyly ol qalalyq máslıhatqa depýtat bolyp saılanǵan bolatyn.