«Aqparattyq tehnologııalar parkiniń» negizgi maqsaty qazaqstandyq aqparattyq tehnologııalar óndirisin damytýǵa úles qosý - M.Qusenov
ALMATY. Qańtardyń 28-i. QazAqparat /Ádilet Musahaev/ - Búgin Almatydaǵy Halyqaralyq aqparattyq tehnologııalar ýnıversıtetinde «Joǵary oqý oryndarynda aqparattyq tehnologııalardy oqytý sapasyn kóterý: joldary men múmkindikteri» atty І Halyqaralyq ǵylymı-tájirıbelik konferentsııa ótti,
dep habarlaıdy QazAqparat.
Shara barysynda osy ýaqytqa deıin Qazaqstanda AT óndirisi nege damymaǵan, Alataý AT qalashyǵynyń udaıy jáne qarqyndy damýyna nege jol tabylmady, biz AT kadrlaryn shetelderde nemese elimizdiń naqty ekonomıkalyq sektoryna daıyndaımyz ba?- degen suraqtarmen qatar, basqa da ózekti máseleler qarastyrylyp, talqylandy.
Sonymen qatar AT bilim berý júıesin ıntegratsııalaý, AT salasyndaǵy halyqaralyq standarttardy, AT sektory damýynyń álemdik tájirıbelerin engizýdiń eń ózekti jáne shuǵyl máseleleri qaralyp, baıandamalar oqyldy.
«AT tehnologııalaryn oqytý boıynsha І halyqaralyq konferentsııa «Aqparattyq tehnologııalar parkiniń» arnaıy ekonomıkalyq aýmaǵynda ótip jatyr. Bul kezdeısoq emes, sebebi ATP-niń negizgi maqsaty qazaqstandyq aqparattyq tehnologııalar óndirisin damytýǵa úles qosý. Qazaqstanda aqparattyq tehnologııalardy qarqyndy damytýǵa baǵyttalǵan túrli qurylymdardyń birigýi, bilim berý men ekonomıkanyń naqty sektorlarynan birlesken tıimdi toptar qurý, ózara qoldaý, tájirıbe almasý jolynda tyǵyz odaq qurýdyń qajettiligi týdy», deıdi Alatau IT city ATP Bas dırektory Maılybek Qusenov.
«Ýnıversıtet óte qysqa merzim ishinde birqatar isterdi atqardy, atap aıtqanda, Carnegie Mellon ýnıversıteti strategııalyq seriktes bolyp tańdaldy. Bul ýnıversıtet tek AT bilim berýge ǵana emes, búkilálemdik AT salasyna standarttar jasaýda. Sonymen qatar álemniń aldyńǵy qatarly joǵary oqý oryndarymen yntymaqtastyq týraly memorondýmdarǵa qol qoıyldy, biz olardyń bıznespen jáne memleketpen yntymaqtasý tájirıbesin qoldanýǵa daıynbyz», deıdi professor, HATÝ rektory Damır Shynybekov.
Konferentsııaǵa QR BǴM jáne QR ATM, otandyq jáne sheteldik AT bıznes ókilderi, qazaqstandyq JOO professor-oqytýshylar quramy qatysady. Konferentsııaǵa jetekshi AT ýnıversıtetteri, Carnegie Mellon, USA, Malaızııa ýnıversıteti, Belarýs memlekettik tehnologııalyq ýnıversıteti, Kólik jáne baılanys ınstıtýty jáne t.b. ókilderi qatysty.
