Aqparattyq tehnologııa salasynda mamandar daıyndaıtyn oqý oryndarynyń múmkindigi óte shekteýli - professor Z.Quralbaev
ALMATY. 29 naýryz. QazAqparat /Erlik Erjanuly/ - Qazir Qazaqstandaǵy túrli deńgeıdegi 170-teı joǵary oqý oryndarynyń bárinde derlik aqparattyq tehnologııa mamandary daıyndalady. Alaıda olardyń sapasy áli syn kótermeıtin jaǵdaıda tur.
Bul týraly Almaty energetıka jáne baılanys ýnıversıtetiniń professory Zaýytbek Quralbaev búgin Almatyda ótip jatqan «Bilim berý salasyndaǵy bultty tehnologııa» degen konferentsııa barysynda aıtty.
"Qazaqstannyń barlyq oqý oryndary aqparattyq tehnologııa mamandaryn daıyndaıdy. Biraq barlyq jerde sapaly daıyndalmaıdy. Oǵan birinshi sebep - muǵalim kadrlardyń jetkiliksizdigi jáne olardyń bilimderiniń tereń emestigi. Ekinshiden, kópshilik oqý oryndarynyń basshylary bul máselege jetkilikti deńgeıde kóńil bólmeýi túrtki bolyp otyr. Bul ýaqytymen jańa tehnıkalardy, ásirese lıtsenzııalyq jańa tehnologııalar men baǵdarlamalyq jabdyqtardy alýda aıqyn ańǵarylýda. Sol sebepti ár muǵalim, ár kafedra óz betterimen jumys istep jatyr. Sondyqtan odan shyqqan mamandardyń da sapasy tómen bolýda. Qazirgi kezde Qazaqstandaǵy eń úlken problema osy bolyp otyr", - deıdi Almaty energetıka jáne baılanys ýnıversıtetiniń kompıýterlik tehnologııalar kafedrasynyń meńgerýshisi Zaýytbek Quralbaev.
Qazirgi kezde barlyq oqý oryndary aqparattyq tehnologııa mamandaryn daıyndaımyz deıdi. Fızıka-matematıka ǵylymdarynyń doktorynyń sózine qaraǵanda, shyndyǵyna kelgende olardyń múmkinshilikteri óte az. Máselen, aqparattyq tehnolgııa mamandary - esepteý tehnologııasy, baǵdarlamalyq jabdyqtaý, aqparattyq júıeler jáne matematıkalyq modeldeý sııaqty 3-4 mamandyq boıynsha daıyndalady. Olar osy mamandyqtardyń bireýinen, ne ekeýinen ǵana daıyndaıdy. Sonyń ózinde aqparattyq tehnologııa mamandaryn paıdalanýshy kommertsııalyq uıymdar men bankter maman kadrlar jetispeıdi degendi aıtýda. Sebebi jylda júzdegen-myńdaǵan adam dıplom alyp shyqqanmen bilimi shekteýli bolǵandyqtan olardyń kóbi óz salasynda jumys jasamaıdy. Óıtkeni kóp nárselerden habarsyz. Olardy úıretýge barlyq joǵary oqý oryndarynyń jaǵdaıy kele bermeıdi. Óz mamandarynyń ózin aqparattyq, kompıýterlik, baǵdarlamalyq jabdyqtarmen qamtamasyz etýge múmkinshilikteri óte shekteýli bolyp otyr.
