Aqparattyq nasıhattyq toptyń múshesi S.Alybaev Qazaq halyqaralyq qatynastar jáne Álem tilderi ýnıversıtetinde boldy
ALMATY. 1 naýryz. QazAqparat /Ádilet Musahaev/ - QR Syrtqy ister mınıstrliginiń syrtqy saıasatty taldaý jáne boljaý komıtetiniń tóraǵasy Serik Alybaev Elbasynyń bıylǵy halyqqa Joldaýyn keńinen túsindirý maqsatynda
búgin Almatydaǵy Abylaı han atyndaǵy Qazaq halyqaralyq qatynastar jáne Álem tilderi ýnıversıtetiniń oqytýshy jáne stýdentter qaýymymen kezdesti.
S.Alybaev syrtqy saıasat isimen aınalysýda shet tilderdi meńgerý óte mańyzdy ekendigin aıta kele, bul mamandyqtyń úlken jaýapkershilikti qajet etetindigin jetkizdi.
"Basqa eldiń prezıdentteri sekildi bizdiń Elbasy da jyl basynda halyqqa óz Joldaýyn usynyp, aldaǵy damý baǵytymyzdy aıqyndap kórsetedi. Bıylǵy Joldaýynda N.Á. Nazarbaev geografııalyq aımaqqa baılanysty sóz qozǵap, Kedendik odaqtyń jumysyn nyǵaıtý kerek ekendigin aıtty. Bul óz kezeginde elimizdiń syrtqy saýda keńistigin keńeıtip otyr", -deıdi ol.
Sonymen qatar ol bıylǵy Joldaýda halyqaralyq qatynastar boıynsha kópjaqty kelisimderge barýdyń mańyzdylyǵy jaıynda aıtylǵandyǵyn jetkizdi. "Elimiz qazir EQYU, KO, ShYU sııaqty birqatar uıymdarmen kelisimderge barýda. Onyń nátıjesinde el bedeli kóterilip, memleketimizge alpaýyt elderdiń basshylary sapar jasady. Sondaı-aq elimiz EQYU-ǵa sátti tóraǵalyq etip, endigi ýaqytta Islam konferentsııasy uıymyna tóraǵalyq etpek", -dedi S.Alybaev.
