Aqparattyq qoljetimdilikti bir júıemen júzege asyratyn zań joq - Májilis depýtaty
ASTANA. Qarashanyń 19-y. QazAqparat /Aıdar Ospanalıev/ -Qazirgi keıbir aqparat quraldarynyń ókilderi aıtyp júrgenindeı aqparatqa tolyqtaı qoljetimdilik elde qalyptasqan máselelerdiń barlyǵyn túbegeıli sheshe almaıdy.
Bul týraly búgin Astanada ótip jatqan «Qazaqstandaǵy jalpyǵa birdeı aqparatqa qoljetimdilik» atty halyqaralyq konferentsııa barysynda Májilis depýtaty Rahmet Muqashev málim etti, dep habarlaıdy QazAqparat.
Onyń aqparatqa qoljetimdilik máselesine baılanysty álemdik tájirıbeni negizge ala otyryp keltirgen málimetterine qaraǵanda, Ulybrıtanııada aqparatqa qoljetimdilikke qatysty arnaıy daıyndalǵan zań jobasy memlekettik organdar men úkimettik emes uıymdar jáne qoǵam ókilderi tarapynan 30 jyl talqylanǵan. «Tek sodan keıin ǵana, eldegi leıborısterdiń saılaý aldynda bergen ýádelerine baılanysty ol Parlamenttiń qaraýyna usynylǵan. Soǵan qaramastan osy zań jobasynda 23 másele boıynsha aqparatqa qoljetimdilikke shekteý qoıylǵan. Bul talaptar qujatta anyq kórsetilgen jáne ol eldiń azamattary buǵan túsinistikpen qarap otyr», dedi depýtat.
Onyń aıtýynsha, mundaı shekteýler Norvegııa memleketinde de bar. «Árıne, aqparatqa qoljetimdilikti qamtamasyz etý qajet. Alaıda bul rette shekteýlerdiń de bolýy mańyzdy. Jalpy, aqparatqa qoljetimdilik máselesine baılanysty sáıkes zańdy bizge de qabyldaý qajet. Biraq bizge bul máseleni tereń zerttep alǵan durys. Osyndaı zań qajet eken dep, ony jan-jaqty zerttemeı jatyp qabyldap jiberýge bolmaıdy. Eń bastysy qazir Úkimette de, Parlamentte de osyndaı qujat qabyldaýǵa degen nıet bar», dedi halyq qalaýlysy.
Onyń pikirinshe, bizde aqparattyq qoljetimdilikti qamtamasyz etýge baǵyttalǵan qujattar bar, biraq olardyń barlyǵy bir júıe boıynsha júzege asyrylyp otyrǵan joq. Al konferentsııaǵa qatysýshylardyń pikirlerinshe, aqparattyq qoljetimdilikti qamtamasyz etýdi bir júıede júzege asyratyn zań qajet.
