Aqparattyq qaýipsizdik jáne radıotehnıka boıynsha olımpıada jeńimpazdary anyqtaldy
ASTANA. QazAqparat - Astanada «Aqparattyq tehnologııalar jáne aqparattyq qaýipsizdik, radıotehnıka men telekommýnıkatsııalar» atty tehnıkalyq oqý oryndarynyń 3-4 kýrs stýdentteri men magıstranttary arasynda ótkizilgen II stýdenttik olımpıadanyń qorytyndylary shyǵaryldy.
«Memlekettik tehnıkalyq qyzmet» RMK men L.N. Gýmılev atyndaǵy EUÝ uıymdastyrǵan olımpıadaǵa Qazaqstan jáne Reseıdiń 14 joǵary oqý oryndarynyń stýdentteri men magıstranttary qatysty. Olardyń ishinde EUÝ, HATÝ, QazUZTÝ, QarMTÝ, ShQMTÝ, TÝSÝR jáne taǵy basqa da joǵary oqý oryndary bar.
«Іrikteý ınternet-týryna 298 stýdent qatysty. Saıystyń 2 kezeńine qazylar alqasynyń sheshimimen 29 jumys ótti, olardyń ishindegi 6 jumys avtorlaryna jeńis ákeldi»,- deıdi olımpıadany uıymdastyrý komıtetiniń tóraǵasy Murat Zakırov.
Sonymen qatar, ol uıymdastyrý komıtetiniń qurastyrǵan konkýrstik tapsyrmalarynyń ishine kásiptik tapsyrma, teorııalyq test suraqtary jáne tájirıbelik esepter kirgeni týraly aıtty. Qazylar alqasy men uıymdastyrý komıtetiniń quramyna «Memlekettik tehnıkalyq qyzmet» RMK jetekshi mamandarymen EUÝ oqytýshy-professorlar quramy kirdi.
«Aqparattyq tehnologııalar jáne aqparattyq qaýipsizdik» sektsııasynyń jeńimpazdary:
1 oryn - Álibek Erǵalıev (AÝES, Almaty q.)
2 oryn - Vladımır Lýkıchev (ıÝKGÝ, Shymkent q.)
3 oryn - Ernar Ývalıev (KarGTÝ, Qaraǵandy q.)
«Radıotehnıka men telekommýnıkatsııalar» sektsııasynyń jeńimpazdary:
1 oryn - Erlan Altynbekov (TÝSÝR, Tomsk q.)
2 oryn - Áıgerim Qurmanbekova (MÝIT, Almaty q.)
3 oryn - Sholpan Jumabekqyzy (MÝIT, Almaty q.)
Marapattaý jáne olımpıadany jabý rásiminde jeńimpazdarǵa 1, 2, 3 dárejeli dıplomdar jáne smartfondar men planshetter tabystaldy. Sonymen qatar, olımpıada jeńimpazdary «Memlekettik tehnıkalyq qyzmet» RMK jumys isteýge shaqyrý aldy.
